മദീന പാഷനില്‍ ഉയര്‍ത്തുന്നതിന്് മദീനയില്‍ നിന്ന് അബ്ദുസ്സമദ് പെരുമുഖത്തിന്റെ നേതൃത്വത്തില്‍ കൊണ്ടുവരുന്ന പതാക ഇന്ന് 4.30ന് വരക്കല്‍ മഖാമില്‍ സംസ്ഥാന ജില്ലാ നേതാക്കളുടെ നേതൃത്വത്തില്‍ സ്വീകരിക്കും.

കോഴിക്കോട്: ഫെബ്രുവരി 24, 25, 26 തിയതികളില്‍ നാദാപുരം ഹുദൈബിയ്യയില്‍ നടക്കുന്ന എസ്.കെ.എസ്.എസ്.എഫ് കോഴിക്കോട് ജില്ലാ സമ്മേളനത്തിന് അന്തിമരൂപമായി. 23 വ്യാഴം വൈകിട്ട് നാലിന് വിഖായ വളണ്ടിയര്‍ വിളംബരറാലി നടക്കും.
സമ്മേളന നഗരിയില്‍ ഉയര്‍ത്തുന്നതിന് മദീനയില്‍നിന്ന് കൊണ്ടുവന്ന പതാക സമസ്ത കേരള ജംഇയ്യത്തുല്‍ ഉലമാ കോഴിക്കോട് ജില്ലാ പ്രസിഡന്റ് ശൈഖുനാ ചേലക്കാട് മുഹമ്മദ് മുസ്‌ലിയാര്‍ 5.30ന് സമാപന സമ്മേളന നഗരിയായ കല്ലാച്ചിയില്‍ ഉയര്‍ത്തും.
24 വെള്ളി വൈകിട്ട് 4.30ന് ഉദ്ഘാടന സമ്മേളനം നടക്കും. സമസ്ത കേന്ദ്ര മുശാവറ അംഗം വാവാട് കുഞ്ഞിക്കോയ മുസ്‌ലിയാര്‍ പ്രാര്‍ഥന നടത്തും. സുന്നി യുവജന സംഘം സംസ്ഥാന ജനറല്‍ സെക്രട്ടറി സയ്യിദ് മുഹമ്മദ് കോയ ജമലുല്ലൈലി തങ്ങള്‍ ഉദ്ഘാടനം ചെയ്യും. സയ്യിദ് ടി.പി സി തങ്ങള്‍ അധ്യക്ഷനാകും. കേരള പ്രതിപക്ഷ ഉപനേതാവ് പി.കെ കുഞ്ഞാലിക്കുട്ടി മുഖ്യാതിഥിയായി സംബന്ധിക്കും.
അബ്ദുസ്സമദ് പൂക്കോട്ടൂര്‍ മുഖ്യപ്രഭാഷണം നിര്‍വഹിക്കും. 7 മണിക്ക് മജ്‌ലിസുന്നുര്‍ ആത്മീയ സദസ് കോഴിക്കോട് വലിയ ഖാസി സയ്യിദ് നാസര്‍ ഹയ്യ് ശിഹാബ് തങ്ങള്‍ ഉദ്ഘാടനം ചെയ്യും. ഹസന്‍ സഖാഫി പൂക്കോട്ടൂര്‍ മുഖ്യപ്രഭാഷണം നിര്‍വഹിക്കും. സമസ്ത കേരള ഇസ്‌ലാം മത വിദ്യാഭ്യാസ ബോര്‍ഡ് ജനറല്‍ സെക്രട്ടറി എം.ടി അബ്ദുല്ല മുസ്‌ലിയാര്‍ നസീഹത്ത് മജ്‌ലിസിന്ന് നേതൃത്വം നല്‍കും.
25 ശനി രാവിലെ ഒന്‍പതിന് പ്രവാസി സംഗമം പാറക്കല്‍ അബ്ദുല്ല എം.എല്‍.എ ഉദ്ഘാടനം ചെയ്യും. എസ്.വി മുഹമ്മദലി മാസ്റ്റര്‍ കണ്ണൂര്‍, സിദ്ധീഖലി രാങ്ങാട്ടൂര്‍ ക്ലാസുകള്‍ക്ക് നേതൃത്വം നല്‍കും. 4.30ന് മാനവികം സെമിനാര്‍ മുല്ലപ്പള്ളി രാമചന്ദ്രന്‍ എം.പി ഉദ്ഘാടനം ചെയ്യും. ഓണംപിള്ളി മുഹമ്മദ് ഫൈസി വിഷയാവതരണം നടത്തും. ഇ.കെ വിജയന്‍ എം.എല്‍.എ, അഡ്വ.ടി. സിദ്ദീഖ്, സി.പി സൈദലവി, കെ.ടി കുഞ്ഞിക്കണ്ണന്‍, മുസ്തഫ മാസ്റ്റര്‍ മുണ്ടുപാറ സംസാരിക്കും.
വൈകിട്ട് ഏഴിന് ആദര്‍ശ സമ്മേളനം സമസ്ത കേന്ദ്ര മുശാവറ അംഗം എ.വി അബ്ദുറഹിമാന്‍ മുസ്‌ലിയാര്‍ ഉദ്ഘാടനം ചെയ്യും. എം.ടി അബൂബക്കര്‍ ദാരിമി, അലവി ദാരിമി കുഴിമണ്ണ പ്രഭാഷണം നടത്തും.
26 ഞായര്‍ രാവിലെ 8.30ന് മദീന പാഷന്‍ പ്രതിനിധി ക്യാംപ് ആരംഭിക്കും. ഒന്‍പതിന് ഗ്രാന്റ് അസംബ്ലിയും 9.30ന് ആരംഭിക്കുന്ന ക്യാംപും സംസ്ഥാന പ്രസിഡന്റ് പാണക്കാട് സയ്യിദ് ഹമീദലി ശിഹാബ് ഉദ്ഘാടനം ചെയ്യും. എസ്.കെ.എസ്.എസ്.എഫ് പുതുതലമുറയുടെ പ്രതീക്ഷക്കൊപ്പം, ഉസ്തുന്‍ ഹസന, ആദര്‍ശ ഭദ്രത ആത്യന്തിക വിജയത്തിന്, സമസ്ത: വിശ്വ ഇസ്‌ലാമിക ഏകകം എന്നീ വിഷയങ്ങളില്‍ സി.എച്ച് മുഹമ്മദ് തയ്യിബ് ഫൈസി, ആസിഫ് ദാരിമി പുളിക്കല്‍, മുസ്തഫ അശ്‌റഫി കക്കുപടി, സത്താര്‍ പന്തല്ലൂര്‍ പ്രബന്ധമവതരിപ്പിക്കും.
വൈകിട്ട് ഏഴിന് സമാപന പൊതുസമ്മേളനം പതിനായിരങ്ങളെ സാക്ഷിനിര്‍ത്തി സമസ്ത പ്രസിഡന്റ് സയ്യിദ് മുഹമ്മദ് ജിഫ്രി മുത്തുക്കോയ തങ്ങള്‍ ഉദ്ഘാടനം ചെയ്യും. സമസ്ത സെക്രട്ടറി കൊയ്യോട് ഉമര്‍ മുസ്‌ലിയാര്‍ മുഖ്യപ്രഭാഷണം നടത്തും.
ചേലക്കാട് മുഹമ്മദ് മുസ്‌ലിയാര്‍, വില്ല്യാപള്ളി ഇബ്രാഹിം മുസ്‌ലിയാര്‍, അബ്ദുല്‍ ഹമീദ് ഫൈസി അമ്പലക്കടവ്, റഹ്മത്തുല്ലാഹ് ഖാസിമി മുത്തേടം ,നാസര്‍ ഫൈസി കുടത്തായി സത്താര്‍ പന്തലൂര്‍ പ്രഭാഷണം നിര്‍വഹിക്കും. മറ്റു സമസ്തയുടെയും പോഷക സംഘടനകളുടെയും നേതാക്കള്‍ സംബന്ധിക്കും.