മമ്പറം: മമ്പറം ഹയര്‍ സെക്കന്‍ഡറി സ്‌കൂള്‍ അന്താരാഷ്ട്ര നിലവാരത്തിലുയര്‍ത്തുന്നതിന് വികസന സമിതി രൂപീകരിച്ചു. ആറുകോടി രൂപയുടെ പദ്ധതിക്കാണ് വികസന സമിതി രൂപം നല്‍കിയത്. ക്ലാസ്‌റൂമുകള്‍ ഹൈടെക്കാക്കുന്നതോടൊപ്പം ലൈബ്രറിയും ലാബുകളും ബാത്ത്‌റൂം സംവിധാനങ്ങളും ഉന്നത നിലവാരത്തിലേക്കുയര്‍ത്തും. ഓരോകുട്ടിക്കും ഒരു കംപ്യൂട്ടര്‍ എന്ന നിലയിലാണ് കംപ്യൂട്ടര്‍ ലാബ് ഒരുക്കുന്നത്. സ്റ്റേഡിയവും നീന്തല്‍കുളവും നിര്‍മിക്കുന്നതോടൊപ്പം സ്‌കൂള്‍ പരിസരത്ത് സൗന്ദര്യവല്‍ക്കരിക്കുകയും ചെയ്യും. കുടിവെള്ള വിതരണ സംവിധാനം വ്യാപകമാക്കും. സ്‌കൂള്‍ ഹാളില്‍ ചേര്‍ന്ന ചടങ്ങില്‍ ജില്ലാ പഞ്ചായത്ത് മെമ്പര്‍ പി ഗൗരി അധ്യക്ഷയായി. ബ്ലോക്ക് പഞ്ചായത്ത് പ്രസിഡണ്ട് കെ.കെ രാജീവന്‍ ഉദ്ഘാടനം ചെയ്തു. സ്‌കൂള്‍ മാനേജര്‍ മമ്പറം പി മാധവന്‍ ആമുഖഭാഷണം നടത്തി. വാര്‍ഡ്‌മെമ്പര്‍മാരായ മനോജ്, വസന്ത, ഹരിദാസ് മൊകേരി പദ്ധതി വിശദീകരിച്ചു. മലബാര്‍ ദേവസ്വം പ്രസിഡണ്ട് സജീവ് മാറോളി, പ്രിന്‍സിപ്പല്‍ കെ രവീന്ദ്രന്‍, പി.ടി.എ പ്രസിഡന്റ് ഇ മനോഹരന്‍, കൈപ്പച്ചേരി മുകുന്ദന്‍, ഭാസ്‌കരന്‍, ലാല്‍ചന്ദ് പ്രസംഗിച്ചു.