കാസര്‍കോട്: മതപണ്ഡിതനും സമസ്ത സീനിയര്‍ ഉപാധ്യക്ഷനുമായിരുന്ന ഖാസി സി.എം അബ്ദുല്ല മൗലവിയുടെ കൊലപാതകവുമായി ബന്ധപ്പെട്ട് പ്രധാന മന്ത്രിയുടെ ഓഫിസില്‍ നിന്നുള്ള വിവരാന്വേഷണം സംസ്ഥാന സര്‍ക്കാറിന്റെ ഫ്രീസറില്‍. കൊലപാതകവുമായി ബന്ധപ്പെട്ട കേസ് സി.ബി.ഐയുടെ ഉന്നത സംഘത്തെ കൊണ്ട് അന്വേഷിപ്പിച്ച് കുറ്റവാളികളെ നിയമത്തിനു മുന്നില്‍ കൊണ്ടുവരുന്നതിന് നടപടികള്‍ ഉണ്ടാക്കണമെന്ന് കാണിച്ച് എസ്.കെ.എസ്.എസ്.എഫ് കാസര്‍കോട് ജില്ലാ കമ്മിറ്റി, ഖാസി സംയുക്ത സമര സമിതി എന്നിവയുടെ നേതൃത്വത്തില്‍ പ്രധാനമന്ത്രിക്ക് ഇ മെയില്‍ സന്ദേശം അയച്ചിരുന്നു. കഴിഞ്ഞ വര്‍ഷം മാര്‍ച്ചിലാണ് അനേകം ഇ മെയിലുകള്‍ പ്രധാനമന്ത്രിക്ക് അയച്ചത്. സി.ബി.ഐ വകുപ്പ് പ്രധാനമന്ത്രി കൈകാര്യം ചെയ്യുന്നതിനാലാണ് സംഘടനകള്‍ ഈ മാര്‍ഗം സ്വീകരിച്ചത്.
തുടര്‍ന്ന് ഏപ്രില്‍ ആദ്യവാരത്തില്‍ തന്നെ പ്രധാനമന്ത്രിയുടെ ഓഫിസില്‍ നിന്ന് മറുപടി ലഭിക്കുകയും ചെയ്തിരുന്നു. പരാതിയുമായി ബന്ധപ്പെട്ടുള്ള വിവരങ്ങള്‍ നല്‍കാന്‍ സംസ്ഥാന സര്‍ക്കാരിനോട് പ്രധാനമന്ത്രിയുടെ ഓഫിസ് ആവശ്യപ്പെട്ടിരുന്നു. എന്നാല്‍ കഴിഞ്ഞ പത്തു മാസമായി കേസുമായി ബന്ധപ്പെട്ട് യാതൊരുവിധ മറുപടിയും സംസ്ഥാന സര്‍ക്കാരിന്റെ ഭാഗത്തു നിന്ന് ലഭിച്ചിട്ടില്ലെന്നാണ് ഇ മെയില്‍ സന്ദേശങ്ങള്‍ അയച്ച കക്ഷികള്‍ക്ക് പ്രധാനമന്ത്രിയുടെ ഓഫിസില്‍ നിന്ന് ഇപ്പോള്‍ ലഭിക്കുന്ന വിവരം.
അബ്ദുല്ല മൗലവി കൊല്ലപ്പെട്ട കേസില്‍ സി.ബി.ഐ കോടതി നിര്‍ദ്ദേശം പാലിക്കാതെയുള്ള അന്വേഷണം നടക്കുന്നതിനാലാണ് ഉന്നത ഉദ്യോഗസ്ഥരെക്കൊണ്ട് അന്വേഷണം നടത്തണമെന്ന ആവശ്യവുമായി സംഘടനകള്‍ ഇമെയില്‍ സന്ദേശങ്ങള്‍ കൈമാറിയത്.