കൊണ്ടോട്ടി: സംസ്ഥാനത്തെ തെരുവോരങ്ങളില്‍ ഇനി മുതല്‍ പരിസ്ഥിതിക്ക് ഹാനികരമല്ലാത്ത എല്‍.ഇ.ഡി ലാമ്പുകള്‍ പ്രകാശിപ്പിച്ചാല്‍ മതിയെന്ന് നിര്‍ദേശം. തദ്ദേശ സ്ഥാപനങ്ങള്‍ പുതുതായി സ്ഥാപിക്കുന്ന തെരുവുവിളക്കുകള്‍ക്ക് സോഡിയംവേപ്പര്‍ ലാമ്പുകള്‍, മെര്‍ക്കുറി വേപ്പര്‍ ലാമ്പുകള്‍, ഹൈവോള്‍ട്ട് ഇന്‍കാന്‍ഡിസന്റ് ലാമ്പുകള്‍ എന്നിവ സ്ഥാപിക്കുന്നതിനും മാറ്റിസ്ഥാപിക്കുന്നതിനും പദ്ധതികള്‍ ഏറ്റെടുക്കാന്‍ പാടില്ലെന്ന് സര്‍ക്കാര്‍ തദ്ദേശ സ്ഥാപനങ്ങള്‍ക്ക് നിര്‍ദേശം നല്‍കി.
തെരുവുവിളക്കിന് തയാറാക്കുന്ന പുതിയ പദ്ധതികളില്‍ എല്‍.ഇ.ഡി ലാമ്പുകള്‍ മാത്രം ഉപയോഗിക്കണമെന്നാണ് നിര്‍ദേശം. എന്നാല്‍ നിലവില്‍ സ്ഥാപിച്ചിട്ടുള്ളവയുടെ അറ്റകുറ്റപ്പണികള്‍ തനത് ഫണ്ട് വകയിരുത്തി ഏറ്റെടുക്കാം. ആയുസ് കൂടിയതും പരിസ്ഥിതിക്ക് ഹാനികരമല്ലാത്തവയുമാണ് എല്‍.ഇ.ഡി ലാമ്പുകള്‍ എന്നുള്ളതിനാലാണ് തെരുവിളക്കുകള്‍ക്ക് എല്‍.ഇ.ഡി ലാമ്പുകള്‍ മതിയെന്ന് തീരുമാനിച്ചത്.
പ്രവര്‍ത്തനരഹിതമായ തെരുവു വിളക്കുകള്‍, തദ്ദേശ സ്ഥാപനങ്ങളുടെ കീഴില്‍ വരുന്ന കെട്ടിടങ്ങളുടെ പാഴായ വൈദ്യുത കണക്ഷന്‍, തകരാറിലായ മീറ്ററുകള്‍ തുടങ്ങിയവ ഒഴിവാക്കണം. ഉപയോഗശൂന്യമായ വൈദ്യുത കണക്ഷന്റെ പേരില്‍ വൈദ്യുതനിരക്ക് നല്‍കുന്ന തദ്ദേശ സ്ഥാപനങ്ങളുടെ എണ്ണം വര്‍ധിച്ചതോടെയാണിത്. വരുമാനം നഷ്ടപ്പെടുത്തുന്ന ഇത്തരം സാഹചര്യം ഒഴിവാക്കണമെന്നും നിര്‍ദേശിച്ചിട്ടുണ്ട്.