ബംഗളൂരു: തെരഞ്ഞെടുപ്പ് തിയതി പ്രഖ്യാപിച്ചിട്ടില്ലെങ്കിലും പ്രചാരണങ്ങള്‍ ശക്തമായ കര്‍ണാടക തെരഞ്ഞെടുപ്പില്‍ ഇത്തവണ പുതിയ വോട്ടര്‍മാരുടെ സാന്നിധ്യം നിര്‍ണായകമാകും. 15ാം നിയമ സഭയിലേക്കുള്ള തെരഞ്ഞെടുപ്പില്‍ 60 ലക്ഷത്തോളം പുതിയ വോട്ടര്‍മാരാണുള്ളതെന്ന് സംസ്ഥാന മുഖ്യ തെരഞ്ഞെടുപ്പ് ഓഫിസര്‍ സഞ്ജീവ് കുമാര്‍ അറിയിച്ചു.
ആകെ 4.96 കോടി വോട്ടര്‍മാരാണ് ഉള്ളത്. 2013ല്‍ നടന്ന തെരഞ്ഞെടുപ്പില്‍ 4.36 കോടി വോട്ടര്‍മാരാണുണ്ടായിരുന്നതെന്ന് മുഖ്യതെരഞ്ഞെടുപ്പ് കമ്മിഷണര്‍ പറഞ്ഞു.
സംസ്ഥാനത്ത് ആകെ 2.51 കോടി പുരുഷ വോട്ടര്‍മാരും 2.44 കോടി വനിതാ വോട്ടര്‍മാരുമാണുള്ളത്. 4,552 പേര്‍ ഭിന്നലിംഗക്കാരാണ്. 18-19 വയസിനിടയില്‍ പ്രായമുള്ള 15.42 ലക്ഷം വോട്ടര്‍മാരാണുള്ളത്. കഴിഞ്ഞ തെരഞ്ഞെടുപ്പില്‍ ഇത് 7.18 ലക്ഷമായിരുന്നു. സൗത്ത് ബംഗളൂരു മണ്ഡലത്തിലാണ് ഏറ്റവും കൂടുതല്‍ വോട്ടര്‍മാരുള്ളത്. 5.5 ലക്ഷം വോട്ടര്‍മാരാണ് ഇവിടെയുള്ളത്. 1.6 ലക്ഷം പേരുള്ള ചിക്മംഗളൂരുവാണ് ഏറ്റവും ചെറിയ മണ്ഡലമെന്ന് സഞ്ജീവ് കുമാര്‍ പറഞ്ഞു.