കണ്ണൂര്‍:  മട്ടന്നൂരിലെ യൂത്ത് കോണ്‍ഗ്രസ് നേതാവ് ശുഹൈബ് അക്രമിക്കപ്പെടുമെന്ന് സി.പി.എം പ്രാദേശിക നേതാക്കള്‍ക്ക് നേരത്തെ അറിയാമായിരുന്നുവെന്ന് പ്രതികളുടെ മൊഴി. എന്നാല്‍ ശുഹൈബിനെ കൊല്ലാന്‍ ഉദ്ദേശിച്ചിരുന്നില്ലെന്നും കാലുവെട്ടാന്‍ മാത്രമായിരുന്നു ലക്ഷ്യമെന്നും കഴിഞ്ഞ ദിവസം അറസ്റ്റിലായ രണ്ടു പ്രതികള്‍ മൊഴി നല്‍കി.  പ്രതികളില്‍ നിന്ന് കേസുമായി ബന്ധപ്പെട്ട പല നിര്‍ണായക മൊഴികളും ലഭിച്ചെന്നാണ് പൊലിസ് പറയുന്നത്. നേരത്തെയുണ്ടായിരുന്ന സംഘര്‍ഷമാണ് കൊലയിലേക്ക് നയിച്ചതെന്നും പൊലിസ് കൂട്ടിച്ചേര്‍ത്തു.

അഞ്ചുപേരാണ് കൊലയാളി സംഘത്തില്‍ ഉണ്ടായിരുന്നത്. അവരില്‍ രണ്ടു പേരാണ് ഇപ്പോള്‍ അറസ്റ്റിലായത്. ഈ അഞ്ചു പേരെയും തിരിച്ചറിഞ്ഞതായും പൊലിസ് പറഞ്ഞു.

കൊലയാളി സംഘത്തില്‍ എസ്.എഫ്.ഐ, ഡി.വൈ.എഫ്.ഐ, സി.ഐ.ടി.യു പ്രവര്‍ത്തകരുണ്ടന്നും  റിപ്പോര്‍ട്ടുണ്ട്. പിടികിട്ടാനുള്ളവരില്‍ രണ്ടു പേര്‍ ഡി.വൈ.എഫ്.ഐ പ്രവര്‍ത്തകരാണെന്നും പൊലിസ് അറിയിച്ചു.