ജിദ്ദ: സ്വദേശി-വിദേശി തുല്യ അനുപാതമുള്ള സ്ഥാപനങ്ങളില്‍ വിദേശികള്‍ക്കുമേല്‍ നിര്‍ബന്ധമാക്കിയ ലെവി ഒഴിവാക്കണമെന്ന് ജിദ്ദ ചേംബര്‍ ഓഫ് കൊമേഴ്‌സ് ആന്‍ഡ് ഇന്‍ഡസ്ട്രീസ് സഊദി തൊഴില്‍ സാമൂഹിക വികസന മന്ത്രാലത്തോട് ആവശ്യപ്പെട്ടു. രാജ്യത്തെ 95 ശതമാനം സ്ഥാപനങ്ങളും ലെവി ഈടാക്കാനുള്ള തീരുമാനത്തിന് എതിരാണെന്നും ചേംബര്‍ അറിയിച്ചു. ലെവി ഈടാക്കിത്തുടങ്ങിയതോടെ രാജ്യത്തെ 16 ശതമാനം സ്ഥാപനങ്ങള്‍ അടച്ചുപൂട്ടുമെന്ന പഠനത്തിനു പിന്നാലെയാണ് ചേംബറിന്റെ അഭ്യര്‍ഥന.
സ്വദേശികളുടെ എണ്ണത്തിനു സമാന അനുപാതം വിദേശികളുള്ള സ്ഥാപനങ്ങളെ ലെവിയില്‍നിന്ന് ഒഴിവാക്കണമെന്നാണ് ജിദ്ദ ചേംബര്‍ തൊഴില്‍ മന്ത്രാലയത്തോട് ആവശ്യപ്പെട്ടിരിക്കുന്നത്. രാജ്യത്തെ ചെറുകിട, ഇടത്തരം സ്ഥാപന ഉടമകളില്‍നിന്ന് ഉയര്‍ന്ന ആവശ്യത്തിന്റെ അടിസ്ഥാനത്തിലാണു നിര്‍ദേശം. 2017 വരെ വര്‍ഷത്തില്‍ 2,400 റിയാലായിരുന്ന ലെവി 2018ല്‍ 4,800 ആയിരിക്കുകയാണ്. ലെവി ഇരട്ടിച്ചതോടെ 16 ശതമാനത്തോളം ചെറുകിട സ്ഥാപനങ്ങള്‍ അടച്ചുപൂട്ടലിന്റെ ഭീഷണിയിലാണെന്നും ചേംബര്‍ വ്യക്തമാക്കി.
11 ശതമാനം സ്ഥാപനങ്ങള്‍ താങ്ങാനാവാത്ത സാമ്പത്തിക പ്രതിസന്ധി നേരിടുകയാണ്. അഞ്ചര ശതമാനം സ്ഥാപനങ്ങള്‍ വികസന പ്രവര്‍ത്തനങ്ങള്‍ നടപ്പാക്കാനാവാതെ വഴിമുട്ടും. രണ്ടര ശതമാനം സ്ഥാപനങ്ങള്‍ക്കു നിലവിലെ പ്ലാനനുസരിച്ചു മുന്നോട്ടുപോകാനാവില്ല. ഒരു വര്‍ഷത്തെ ലെവി മുന്‍കൂറായി അടക്കുമ്പോള്‍ തൊഴിലാളി രാജ്യം വിട്ടുപോയാലും അവശേഷിക്കുന്ന കാലത്തേക്കുള്ള സംഖ്യ തിരിച്ചുനല്‍കില്ലെന്ന നിലപാട് പുനഃപരിശോധിക്കണമെന്നും ചേംബര്‍ മന്ത്രാലയത്തോട് അഭ്യര്‍ഥിച്ചു. തൊഴിലാളികളുടെ ആശ്രിതര്‍ക്ക് ഏര്‍പ്പെടുത്തിയ ലെവി അടക്കാന്‍ വൈകുന്നതു സ്ഥാപനത്തിന്റെ ഇലക്ട്രോണിക് നടപടികള്‍ക്ക് തടസമാവാതിരിക്കണമെന്നും നിര്‍ദേശത്തില്‍ പറയുന്നു.