ഷൊര്‍ണൂര്‍: പുതിയ ആധ്യയനവര്‍ഷം ഇന്നു തുടങ്ങാനിരിക്കേ വിദ്യാര്‍ഥികളെ സ്വീകരിക്കാന്‍ സ്‌കൂളുകള്‍ ഒരുങ്ങി. പ്രവേശനോത്സവം ഗംഭീരമായി ആഘോഷിക്കാന്‍ തന്നെയാണ് വിദ്യാഭ്യാസ വകുപ്പിന്റെ നിര്‍ദ്ദേശം. ഷൊര്‍ണൂര്‍ ഉപജില്ലയില്‍ പത്ത് ഹൈസ്‌കൂള്‍, 15 യു.പി സ്‌കൂള്‍, 46 എല്‍.പി. സ്‌കൂളുകളടക്കം എഴുപത്തിയഞ്ച് സ്‌കൂളുകളാണ് ഉള്ളത്. അധ്യാപകര്‍ക്കുള്ള പരിശീലനം കഴിഞ്ഞയാഴ്ച അവസാനം പൂര്‍ത്തിയായി. ഷൊര്‍ണൂര്‍ ഉപജില്ലയിലെ പ്രവേശനോത്സവം വാടാനാം കുര്‍ശ്ശി ഗവ. യു.പി. സ്‌കൂളില്‍വെച്ചു നടക്കും. അതാതു സ്‌കൂളുകളില്‍ പി.ടി.എ യുടെ സഹകരണത്തോടെയാണ് പ്രവേശനോത്സവം നടക്കുക. ഇന്നു മുതല്‍ വിദ്യാര്‍ഥികളെക്കൊണ്ട് റോഡുകള്‍ നിറയും. അംഗനവാടികളിലും പ്രവേശനോത്സവം വിവിധ പരിപാടികളോടെ ആഘോഷിക്കും.