വാഷിങ്ടണ്‍: ഇന്ത്യന്‍ തൊഴിലാളികള്‍ക്കു തിരിച്ചടിയാകുന്ന നീക്കവുമായി വീണ്ടും അമേരിക്കന്‍ ഭരണകൂടം. എച്ച്-1 ബി വിസാ നടപടിക്രമങ്ങള്‍ കൂടുതല്‍ കര്‍ശനമാക്കി യു.എസ് ഭരണകൂടം പുതിയ നയം പ്രഖ്യാപിച്ചു.
മാതൃ കമ്പനിയില്‍നിന്ന് മറ്റ് കമ്പനികളിലേക്ക് ജോലിയാവശ്യാര്‍ഥം ഡെപ്യൂട്ടേഷനില്‍ മാറുന്ന തൊഴിലാളികളുടെ വിസാനടപടിക്രമങ്ങളാണു പുതുതായി കര്‍ക്കശമാക്കിയിരിക്കുന്നത്.വ്യാഴാഴ്ചയാണ് യു.എസ് സിറ്റിസണ്‍ഷിപ്പ് ആന്‍ഡ് എമിഗ്രേഷന്‍ സര്‍വിസസ് എന്ന പേരിലുള്ള ഏഴു പേജുള്ള പുതിയ നയം യു.എസ് സര്‍ക്കാര്‍ പ്രഖ്യാപിച്ചത്. ജീവനക്കാരെ മറ്റ് കമ്പനികളിലേക്കു വിടുന്നതിനുള്ള വിശദീകരണം മാതൃകമ്പനികള്‍ തന്നെ നേരിട്ട് അധികൃതര്‍ക്കു നല്‍കണം.
അതോടൊപ്പം ഈ തൊഴിലാളിയുടെ ജോലി വൈദഗ്ധ്യത്തെ കുറിച്ചും വിശദീകരണം നല്‍കണം. തുടര്‍ന്നു നല്‍കുന്ന എച്ച്-1 ബി വിസയ്ക്ക് മൂന്നു വര്‍ഷത്തെ കാലാവധി മാത്രമേ ഉണ്ടാകൂ.അമേരിക്കയില്‍ വിദഗ്ധ മേഖലകളില്‍ ജോലി ചെയ്യുന്ന തൊഴിലാളികള്‍ക്ക് നല്‍കുന്ന ചെറിയ കാലത്തേക്കുള്ള വിസയാണ് എച്ച്-1 ബി. വിദഗ്ധ മേഖലയിലെ ബിരുദമാണ് അടിസ്ഥാനയോഗ്യത. ഈ വിസ ലഭിക്കുന്നവരില്‍ 68 ശതമാനവും ഇന്ത്യക്കാരാണ്.
ബാങ്കിങ്, ഐ.ടി, കൊമേഴ്‌സ്യല്‍ സര്‍വിസ് തുടങ്ങിയ വിഭാഗങ്ങളിലായി ഓരോ വര്‍ഷവും ലക്ഷക്കണക്കിന് ഇന്ത്യക്കാര്‍ക്ക് ഈ വിസ ലഭിക്കാറ്. 2016ലെ കണക്കനുസരിച്ച് 1,26,692 ഇന്ത്യക്കാര്‍ക്കാണ് എച്ച്-1 ബി വിസ അനുവദിച്ചിട്ടുള്ളത്. പുതിയ നയം ഇന്ത്യന്‍ ഐ.ടി കമ്പനികളെയും അവിടങ്ങളിലെ തൊഴിലാളികളെയുമാണ് കൂടുതല്‍ ബാധിക്കുക.