ഷില്ലോങ്: മേഘാലയയില്‍ ക്രിസ്ത്യന്‍ പള്ളികള്‍ക്ക് മാത്രമല്ല ക്ഷേത്രങ്ങള്‍ക്കും കേന്ദ്ര സര്‍ക്കാര്‍ പണം നല്‍കിയിട്ടുണ്ടെന്ന് കേന്ദ്ര ടൂറിസം മന്ത്രി അല്‍ഫോണ്‍സ് കണ്ണന്താനം.
സംസ്ഥാന തെരഞ്ഞെടുപ്പ് മുന്നില്‍ കണ്ട് ക്രിസ്ത്യന്‍ പള്ളികള്‍ക്ക് കേന്ദ്രസര്‍ക്കാര്‍ പണം വാഗ്ദാനം ചെയ്യുന്നതായി കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി ആരോപിച്ചിരുന്നു.
മേഘാലയയില്‍ തെരഞ്ഞെടുപ്പ് പ്രചാരണത്തിന് എത്തിയപ്പോഴാണ് അല്‍ഫോണ്‍സ് കണ്ണന്താനം കോണ്‍ഗ്രസ് അധ്യക്ഷന്റെ വാദത്തെ എതിര്‍ത്തത്.
ക്രിസ്ത്യന്‍ പള്ളികള്‍ കേന്ദ്ര സര്‍ക്കാര്‍ വിലക്കെടുക്കുന്നുവെന്ന രാഹുലിന്റെ ആരോപണത്തേയും അദ്ദേഹം വിമര്‍ശിച്ചു.
പള്ളികള്‍ വിലകൊടുത്തു വാങ്ങാന്‍ കഴിയുന്നവയാണോ? ആരാധനാലയങ്ങളുടെ വികസനത്തിന് 70 കോടിയാണ് കേന്ദ്രം വകയിരുത്തിയത്. ഇത് ഏതെങ്കിലും മത വിഭാഗത്തിന് മാത്രമായുള്ളതല്ല.
70 വര്‍ഷത്തോളം കേന്ദ്രത്തിലും 45 വര്‍ഷത്തോളം മേഘാലയയിലും കോണ്‍ഗ്രസ് ഭരിച്ചിട്ടും ക്രിസ്ത്യാനികള്‍ക്ക് വേണ്ടി എന്താണ് അവര്‍ ചെയ്തതെന്നും കണ്ണന്താനം ചോദിച്ചു.