നൗകാംപ്: ജിറോണയെ ഒന്നിനെതിരേ ആറ് ഗോളുകള്‍ക്ക് തകര്‍ത്ത് ബാഴ്‌സലോണ ലാ ലിഗയില്‍ വിജയക്കുതിപ്പ് തുടരുന്നു. സുവാരസിന്റെ ഹാട്രിക് ബലത്തിലാണ് ബാഴ്‌സലോണ ജിറോണയെ തകര്‍ത്തെറിഞ്ഞത്. രണ്ട് ഗോളുകള്‍ നേടുകയും രണ്ട് ഗോളുകള്‍ക്ക് വഴിയൊരുക്കുകയും ചെയ്ത മെസ്സിയാണ് മത്സരത്തിലെ താരം. ശേഷിച്ച ഗോള്‍ ബ്രസീല്‍ താരം കുട്ടീഞ്ഞോ നേടി. കുട്ടീഞ്ഞോയുടെ ആദ്യ ലാലിഗ ഗോളാണിത്.
മത്സരത്തിന്റെ മൂന്നാം മിനുട്ടില്‍ നൗകാംപിനെ ഞെട്ടിച്ച് പോര്‍ട്ടുവിലൂടെ ജിറോണ ലീഡെടുത്തു. ബാഴ്‌സയുടെ പ്രതിരോധത്തിലെ പിഴവ് മുതലെടുത്താണ് പോര്‍ട്ടു ഗോള്‍ നേടിയത്. ഗോള്‍ വീണതോടെ ബാഴ്‌സലോണ പതറിയെങ്കിലും രണ്ട് മിനുട്ടിനുള്ളില്‍ സുവാരസിലൂടെ തിരിച്ചടിച്ചു.
മെസ്സിയുടെ തകര്‍പ്പന്‍ പാസിലായിരുന്നു സുവാരസിന്റെ ഗോള്‍. മത്സരത്തിന്റെ 62 ശതമാനം പന്ത് കൈവശം വച്ച ബാഴ്‌സലോണ ആദ്യ പകുതിക്ക് മുന്‍പ് തന്നെ നാല് ഗോളുകള്‍ നേടി കളി വരുതിയിലാക്കി. മെസ്സി(30, 36), സുവാരസ് (5, 44) എന്നിവരാണ് ഗോള്‍ നേടിയത്. ആദ്യ പകുതിയില്‍ നാല് ഗോളുകള്‍ വലയില്‍ വീണതിനാല്‍ രണ്ടാം പകുതിയിലും ജിറോണക്ക് മത്സരത്തിലേക്ക് തിരിച്ചു വരാനായില്ല. 66ാം മിനുട്ടില്‍ കുട്ടീഞ്ഞോയും 76ാം മിനുട്ടില്‍ സുവാരസും ബാഴ്‌സലോണക്ക് വേണ്ടി ഗോള്‍ നേടിയതോടെ ജിറോണ പോരാട്ടം അവസാനിപ്പിച്ചു.
25 മത്സരങ്ങളില്‍ നിന്ന് 20 ജയവും അഞ്ച് സമനിലയുമടക്കം 65 പോയിന്റോടെ പട്ടികയില്‍ ഒന്നാം സ്ഥാനത്താണ് ബാഴ്‌സലോണ. രണ്ടാം സ്ഥാനത്തുള്ള അത്‌ലറ്റിക്കോ മാഡ്രിഡിന് 55 പോയിന്റും മൂന്നാം സ്ഥാനത്തുള്ള റയല്‍ മാഡ്രിഡിന് 51 പോയിന്റുമാണുള്ളത്. മറ്റൊരു മത്സരത്തില്‍ വിയ്യാറയല്‍ ഗെറ്റാഫയെ ഏതിരില്ലാത്ത ഒരു ഗോളിന് പരാജയപ്പെടുത്തി.
മറ്റൊരു മത്സരത്തില്‍ വിയ്യാറല്‍ സ്വന്തം തട്ടകത്തില്‍ മറുപടിയില്ലാത്ത ഒറ്റ ഗോളിന് ഗെറ്റാഫയെ പരാജയപ്പെടുത്തി.

വമ്പന്‍ തിരിച്ചുവരവുമായി ഗോവ

പൂനെ: ഇന്ത്യന്‍ സൂപ്പര്‍ ലീഗില്‍ ഗോവയുടെ വമ്പന്‍ തിരിച്ചുവരവ്. എഫ്.സി പൂനെ സിറ്റിയെ അവരുടെ തട്ടകത്തില്‍ നാണംകെട്ട തോല്‍വിയിലേക്ക് തള്ളിയിട്ട് എഫ്.സി ഗോവ സെമി പ്രതീക്ഷ സജീവമാക്കി. മറുപടിയില്ലാത്ത നാല് ഗോളുകള്‍ക്കാണ് അവര്‍ പൂനെയെ വീഴ്ത്തിയത്. കോറോ ഇരട്ട ഗോളുകള്‍ നേടിയപ്പോള്‍ ഹ്യൂഗോ ബൗമോസ്, മനുവല്‍ സാന്‍സരോറ്റെ എന്നിവരും ഗോവയ്ക്കായി വല കുലുക്കി.
മറ്റൊരു മത്സരത്തില്‍ ബംഗളൂരു മറുപടിയില്ലാത്ത രണ്ട് ഗോളുകള്‍ക്ക് ജംഷഡ്പൂരിനെ വീഴ്ത്തി. ഫെഡോര്‍, സുനില്‍ ഛേത്രി എന്നിവരുടെ ഗോളുകളാണ് അവര്‍ക്ക് വിജയമൊരുക്കിയത്, ജംഷഡ്പൂരിന്റെ തോല്‍വി ബ്ലാസ്റ്റേഴ്‌സിന്റെ സെമിയിലേക്കുള്ള വിദൂര സാധ്യതയ്ക്ക് ബലം കൂട്ടുന്നതായി മാറി.

ചെല്‍സിയെ വീഴ്ത്തി മാഞ്ചസ്റ്റര്‍

ലണ്ടന്‍: ഇംഗ്ലീഷ് പ്രീമിയര്‍ ലീഗിലെ ക്ലാസ്സിക്ക് പോരാട്ടത്തില്‍ മാഞ്ചസ്റ്റര്‍ യുനൈറ്റഡ് സ്വന്തം തട്ടകത്തില്‍ ചെല്‍സിയെ വീഴ്ത്തി. ഒന്നിനെതിരേ രണ്ട് ഗോളുകള്‍ക്കാണ് മാഞ്ചസ്റ്ററിന്റെ വിജയം. വില്ല്യന്റെ ഗോളില്‍ ലീഡെടുത്ത ചെല്‍സിയെ ലുകാകു, ലിംഗാര്‍ഡ് എന്നിവരുടെ ഗോള്‍ നേട്ടത്തിലാണ് മാഞ്ചസ്റ്റര്‍ വീഴ്ത്തിയത്. മറ്റൊരു മത്സരത്തില്‍ ടോട്ടനം ഹോട്‌സ്പര്‍ ക്രിസ്റ്റല്‍ പാലസിനെ എതിരില്ലാത്ത ഒരു ഗോളിന് പരാജയപ്പെടുത്തി. 88ാം മിനുട്ടില്‍ ഹാരി കെയ്ന്‍ നേടിയ ഗോളിലാണ് ടോട്ടനത്തിന്റെ വിജയം.

ഇന്ററിനും ലാസിയോക്കും ജയം

മിലാന്‍: ഇറ്റാലിയന്‍ സീരി എയില്‍ ഇന്റര്‍ മിലാന്‍, ലാസിയോ ടീമുകള്‍ക്ക് വിജയം. ഇന്റര്‍ സ്വന്തം തട്ടകത്തില്‍ ബെന്‍വെന്റോയെ 2-0ത്തിനും ലാസിയോ എവേ പോരാട്ടത്തില്‍ 3-0ത്തിന് സസോളോയേയും പരാജയപ്പെടുത്തി.

മോണാക്കോയ്ക്ക് സമനില

പാരിസ്: ഫ്രഞ്ച് ലീഗ് വണ്‍ പോരാട്ടങ്ങളില്‍ നിലവിലെ ചാംപ്യന്‍മാരായ മൊണാക്കോയെ ത്രില്ലര്‍ പോരാട്ടത്തില്‍ ടോളൗസ് 3-3ന് സമനിലയില്‍ തളച്ചു. 3-1ന് മുന്നില്‍ നിന്ന ശേഷമാണ് മൊണാക്കോ മത്സരം കളഞ്ഞുകുളിച്ചത്. മറ്റൊരു മത്സരത്തില്‍ കരുത്തരായ നീസിനെ ബോര്‍ഡെക്‌സ് ഗോള്‍രഹിത സമനിലയിലും കുരുക്കി. നാന്റസിനെ അമിയെന്‍സ് എവേ പോരാട്ടത്തില്‍ 0-1ന് അട്ടിമറിച്ചു.

ഷാല്‍കെയ്ക്ക് വിജയം
മ്യൂണിക്ക്: ജര്‍മന്‍ ബുണ്ടസ് ലീഗയില്‍ ഷാല്‍കെയ്ക്ക് വിജയം. മറുപടിയില്ലാത്ത രണ്ട് ഗോളുകള്‍ക്ക് അവര്‍ എവേ പോരാട്ടത്തില്‍ ബയര്‍ ലെവര്‍കൂസനെ വീഴ്ത്തി.