പ്യോങ്‌യാങ്: സിറിയയ്ക്ക് രാസായുധം നല്‍കുന്നുവെന്ന ആരോപണങ്ങള്‍ തള്ളിക്കളഞ്ഞ് ഉത്തര കൊറിയ. സിറിയയില്‍ പൗരന്മാര്‍ക്കെതിരേ കൂട്ടക്കുരുതി നടത്തുന്ന സര്‍ക്കാര്‍ സേനയ്ക്കു രാസായുധങ്ങള്‍ എത്തിക്കുന്നത് ഉ.കൊറിയയാണെന്ന് കഴിഞ്ഞ ദിവസം വിവിധ രാജ്യങ്ങള്‍ ആരോപിച്ചിരുന്നു. ഇതിനോടു പ്രതികരിക്കുകയായിരുന്നു രാജ്യം.
അമേരിക്ക നിര്‍മിച്ചുണ്ടാക്കിയ വാര്‍ത്തയാണിതെന്ന് ഉ.കൊറിയന്‍ വിദേശകാര്യ മന്ത്രാലയം വക്താവ് പറഞ്ഞു. സര്‍ക്കാര്‍ വാര്‍ത്താ ഏജന്‍സിയായ കെ.സി.എന്‍.എ ആണ് വാര്‍ത്ത പുറത്തുവിട്ടത്. 'ഞങ്ങള്‍ രാസായുധങ്ങള്‍ നിര്‍മിക്കുകയോ വികസിപ്പിക്കുകയോ ചെയ്യുന്നില്ലെന്നു നിരവധി തവണ വ്യക്തമാക്കിയതാണ്. രാസായുധങ്ങള്‍ക്കുതന്നെ എതിരാണ് രാജ്യം '-വക്താവ് വ്യക്തമാക്കി.