ഇസ്‌ലാമാബാദ്: പാകിസ്ഥാനില്‍ ബി.എല്‍എ നടത്തിയ ട്രെയിന്‍ റാഞ്ചലില്‍ ബന്ദികളാക്കിയവരെ മോചിപ്പിച്ചു. പാകിസ്ഥാന്‍ സൈനിക വക്താവ് എ.എഫ്.പിയോടാണ് ഇക്കാര്യം സ്ഥിരീകരിച്ചത്. മൊത്തം 346 ബന്ദികളെയാണ് മോചിപ്പിച്ചത്. ഏറ്റുമുട്ടലില്‍ 30 ഭീകരര്‍ കൊല്ലപ്പെട്ടു. ട്രെയിനില്‍ യാത്ര ചെയ്ത ഓഫ് ഡ്യൂട്ടിയിലുണ്ടായിരുന്ന 27 സൈനികരെ ഭീകരര്‍ വധിച്ചു. മറ്റൊരു സൈനികന്‍ ഏറ്റുമുട്ടലിലും കൊല്ലപ്പെട്ടു. 450ഓളം യാത്രക്കാര്‍ ട്രെയിനിലുണ്ടായിരുന്നു.

കഴിഞ്ഞ ദിവസമാണ് ബലൂചിസ്ഥാന്‍ സായുധ സംഘം ട്രയിന്‍ റാഞ്ചിയത്. ഉള്‍നാടന്‍ ഗ്രാമത്തിലൂടെ ട്രെയിന്‍ കടന്നുപോകുമ്പോഴായിരുന്നു ആക്രമണം. പാളത്തില്‍ സ്‌ഫോടനം നടത്തിയ ശേഷം ട്രെയിനില്‍ ഭീകരര്‍ ഇരച്ചുകയറി യാത്രക്കാരെ ബന്ദികളാക്കുകയായിരുന്നു. 450 പേരാണ് ട്രെയിനിലുണ്ടായിരുന്നത്. ബലൂചിസ്ഥാന്‍ ലിബറേഷന്‍ ആര്‍മി ട്രെയിന്‍ റാഞ്ചുന്നതിന്റെ ദൃശ്യങ്ങള്‍ പുറത്ത് വന്നിരുന്നു. ബി.എല്‍.എ തന്നെയാണ് ട്രെയിന്‍ തട്ടിയെടുക്കുന്നതിന്റെയും യാത്രികരെ ബന്ദിയാക്കുന്നതിന്റേയും വീഡിയോ പുറത്ത് വിട്ടിരുന്നത്. ഒരു മിനുട്ടും 23 സെക്കന്റും നീളുന്ന വിഡിയോയാണ് പുറത്തുവിട്ടത്.ട്രെയിന്‍ പോകുമ്പോള്‍ ട്രാക്കില്‍ സ്‌ഫോടനം നടക്കുന്നതും പിന്നാലെ ഒളിഞ്ഞിരുന്ന ബിഎല്‍എ സായുധസംഘം ജാഫര്‍ എക്പ്രസ് ട്രെയിനിനടുത്തേക്ക് പാഞ്ഞടുക്കുന്നതും ദൃശ്യങ്ങളിലുണ്ടായിരുന്നു. തുടര്‍ന്ന് ട്രെയിന്‍ വളഞ്ഞ സംഘം യാത്രക്കാരെ പുറത്തിറക്കി ബന്ദികളാക്കുന്നതും പുറത്തുവന്ന വീഡിയോയില്‍ ഉണ്ടായിരുന്നു. 

പര്‍വത മേഖലയിലൂടെ കടന്നുപോകുന്ന ട്രെയിനാണ് ആക്രമിക്കപ്പെട്ടത്. സൈന്യത്തിനും രക്ഷാപ്രവര്‍ത്തകര്‍ക്കും ചെന്നെത്താന്‍ പ്രയാസമുള്ള ഭാഗത്താണ് ആക്രമണം നടന്നത്. ജയിലുള്ള തങ്ങളുടെ അംഗങ്ങളെ വിട്ടുകിട്ടണമെന്ന ആവശ്യവുമായാണ് ഇവര്‍ ട്രെയിന്‍ റാഞ്ചിയത്.