മുംബൈ: പഞ്ചാബ് നാഷണല്‍ ബാങ്കില്‍ നിന്ന് 12,636 കോടി രൂപ തട്ടിച്ച് മുങ്ങിയ വജ്രവ്യാപാരി നീരവ് മോദിക്കും പങ്കാളി മെഹുല്‍ ചോക്‌സിക്കും എതിരെ ജാമ്യമില്ലാ അറസ്റ്റ് വാറണ്ട്. സാമ്പത്തിക തട്ടിപ്പ് തടയല്‍ നിയമപ്രകാരം പ്രത്യേക കോടതിയാണ് അറസ്റ്റ് വാറണ്ട് പുറപ്പെടുവിച്ചത്.

അതേസമയം, ജാമ്യമില്ലാ അറസ്റ്റ് വാറണ്ടിനെതിരെ ഹൈക്കോടതിയെ സമീപിക്കുമെന്ന് ഇരുവരുടെയും വക്കിലായ വിജയ് അഗര്‍വാള്‍ പറഞ്ഞു.

കേസില്‍ സി.ബി.ഐ പ്രത്യേക കോടതിക്കു മുമ്പാകെ, ആറു പ്രതികളെ ഹാജരാക്കിയിട്ടുണ്ട്. ഇതില്‍ ഗോകുല്‍നാഥ് ഷെട്ടിയെ പൊലിസ് കസ്റ്റഡിയിലും അഞ്ചു പേരെ ജുഡീഷ്യല്‍ കസ്റ്റഡിയിലും വിട്ടുകിട്ടണമെന്ന് ആവശ്യപ്പെട്ടിരിക്കുകയാണ്.

നേരത്തെ, 11,421 കോടി രൂപയുടെ തട്ടിപ്പു നടത്തിയെന്നായിരുന്നു കേസ്. ഫെബ്രുവരി 27ന് 1251 കോടി രൂപ കൂടി തട്ടിച്ചെന്ന കേസും സി.ബി.ഐ രജിസ്റ്റര്‍ ചെയ്തു. ഇതോടെ മൊത്തം, 12,636 കോടി രൂപയുടെ തട്ടിപ്പാണ് നടന്നതെന്ന് സി.ബി.ഐ പ്രസ്താവനയില്‍ അറിയിച്ചു.