സന്‍ആ: യമനിലെ സലഫീ ഭീകരതയുടെ ഇരയായി ഒരു സൂഫി പണ്ഡിതന്‍ കൂടി കൊല്ലപ്പെട്ടു. തെക്കന്‍ യമനിലെ ഹദര്‍മൗത്തിലുള്ള പ്രമുഖ പണ്ഡിതനായ ശൈഖ് ഹബീബ് ഐദറൂസ് ബിന്‍ അബ്ദുല്ല ബിന്‍ സുമൈത്ത് ആണ് നിസ്‌കാരത്തിനിടെ അജ്ഞാതസംഘത്തിന്റെ വെടിയേറ്റു മരിച്ചത്. സംഭവത്തിനു പിന്നില്‍ സലഫി ഭീകരരാണെന്നാണ് അദ്ദേഹത്തിന്റെ അടുത്ത വൃത്തങ്ങള്‍ അറിയിച്ചത്.
വെള്ളിയാഴ്ച രാവിലെയാണ് സംഭവം നടന്നത്. ആത്മീയ ഉപദേശം തേടിയെത്തിയ വിശ്വാസിയാണെന്ന വ്യാജേനയാണ് അക്രമികള്‍ ഹബീബ് ഐദറൂസിന്റെ വീട്ടിലെത്തിയത്. തുടര്‍ന്ന് അദ്ദേഹം പ്രഭാത നേരത്തെ പ്രത്യേക പ്രാര്‍ഥനയായ ദുഹാ നിസ്‌കാരം നിര്‍വഹിക്കുന്നതനിടെ സംഘത്തില്‍ ഒരാള്‍ അദ്ദേഹത്തിനു നേരെ വെടിയുതിര്‍ക്കുകയായിരുന്നു. ഉടന്‍ തന്നെ സംഘം ഇവിടെനിന്നു കടന്നുകളഞ്ഞു.
ബാഅലവി സൂഫി ധാരയിലെ പ്രമുഖ ആത്മീയഗുരുവാണ് കൊല്ലപ്പെട്ട ഹബീബ് ഐദറൂസ് ബിന്‍ അബ്ദുല്ല. ഹദര്‍മൗത്തിലെ വിശ്വാസികള്‍ ആരാധനാകര്‍മങ്ങള്‍ക്കും മറ്റും നിരന്തരം ആശ്രയിക്കുന്ന വ്യക്തി കൂടിയായിരുന്നു. യമനിലെ ഉന്നത ഇസ്‌ലാമിക പാഠശാലകളില്‍ പഠനം നടത്തുന്ന മലയാളി വിദ്യാര്‍ഥികളുമായും അദ്ദേഹം ഉറ്റബന്ധം പുലര്‍ത്തിയിരുന്നു.
ആഭ്യന്തരയുദ്ധം രൂക്ഷമായ യമനില്‍ ഇതിനു മുന്‍പും സുന്നി പണ്ഡിതര്‍ക്കെതിരേ സലഫി ഭീകരവാദികളുടെ ആക്രമണമുïായിരുന്നു. ലോകപ്രശസ്ത ഇസ്‌ലാമിക പണ്ഡിതനായ ശൈഖ് ഹബീബ് ഉമറിനെതിരേയും മുന്‍പ് ഭീകരാക്രമണം നടന്നിരുന്നു. ഏദനില്‍ നിരവധി മതപണ്ഡിതരെ ഐ.എസ്, അല്‍ഖാഇദ അടക്കമുള്ള ഭീകരസംഘങ്ങള്‍ വകവരുത്തുകയും ചെയ്തിട്ടുï്.
സംഭവത്തെ യമന്‍ പ്രധാനമന്ത്രി അഹ്മദ് ഉബൈദ് ബിന്‍ ദാഗിര്‍ അപലപിച്ചു. സത്യസന്ധതയുടെയും ധാര്‍മികചിന്തയുടെയും കാര്യത്തില്‍ പേരുകേട്ട രാജ്യത്തെ പ്രമുഖ മിതവാദി ശബ്ദങ്ങളില്‍ ഒരാളായിരുന്നു ബിന്‍ സുമൈത്തെന്ന് അദ്ദേഹം അനുശോചന കുറിപ്പില്‍ പറഞ്ഞു.