കൊല്‍കത്ത: ഐ ലീഗിലെ കിരീടപ്പോരാട്ടം ആവേശകരമായ അന്ത്യത്തിലേക്ക്. അവസാന മത്സരത്തില്‍ ചര്‍ച്ചില്‍ ബ്രദേഴ്‌സിനെ മോഹന്‍ ബഗാന്‍ പരാജയപ്പെടുത്തിയതോടെയാണ് ഈസ്റ്റ് ബംഗാളിനും മിനര്‍വക്കുമൊപ്പം കീരിടത്തിലേക്ക് മോഹന്‍ ബഗാന്‍ ഒരു പടി കൂടി അടുത്തത്.
17 മത്സരങ്ങള്‍ കളിച്ച ബഗാന്‍ ഈസ്റ്റ് ബംഗാളിനെ മറികടന്ന് പോയിന്റ് പട്ടികയില്‍ മൂന്നാമതെത്തി. 29 പോയിന്റുള്ള ഈസ്റ്റ് ബംഗാളിന് രണ്ടു മത്സരം കൂടി ബാക്കിയുണ്ട്. 31 പോയിന്റുള്ള നെരോക്കക്കും 32 പോയിന്റുള്ള മിനര്‍വക്കും ഓരോ കളികള്‍ ബാക്കിയുണ്ട്. രണ്ട് കളിയിലും ജയിക്കാനായാല്‍ നാലാം സ്ഥാനത്ത് നില്‍കുന്ന ഈസ്റ്റ് ബംഗാളിന് 35 പോയിന്റുമായി ഐ ലീഗ് ചാംപ്യന്‍മാരാകാം.
നിലവില്‍ 32 പോയിന്റുമായി മിനര്‍വ പഞ്ചാബാണ് ഒന്നാം സ്ഥാനത്ത്. രണ്ടാം സ്ഥാനത്തുള്ള നെരോക്കയും ഈസ്റ്റ് ബംഗാളും തമ്മിളുള്ള മത്സരത്തിലായിരിക്കും വിധി നിര്‍ണയം നടക്കുക. ലജോങ്ങുമായിട്ടാണ് ഈസ്റ്റ് ബംഗാളിന്റെ മറ്റൊരു മത്സരം. ഐ ലീഗില്‍ നാലു മത്സരം മാത്രം ശേഷിക്കെ ആരാകും ചാംപ്യന്‍മാര്‍ എന്നറിയാന്‍ കാത്തിരിക്കുകയാണ് ഫുട്‌ബോള്‍ പ്രേമികള്‍.
അടുത്ത മത്സരത്തില്‍ കൂടി ചര്‍ച്ചില്‍ പരാജയപ്പെട്ടാല്‍ ലീഗില്‍ നിന്ന് സെക്കന്‍ഡ്് ഡിവിഷനിലേക്ക് തരം താഴ്ത്തും. ഇതിനെ പ്രതിരോധിക്കാന്‍ ചര്‍ച്ചില്‍ കൂടി ഇറങ്ങുന്നതോടെ അവസാന നാലു മത്സരം പൊടിപാറും.