റിയാദ്: സഊദി കിരീടാവകാശിയും പ്രതിരോധ മന്ത്രിയുമായ മുഹമ്മദ് ബിന്‍ സല്‍മാന്‍ രാജകുമാരന്റെ വിദേശയാത്രക്ക് തുടക്കമായി. ആദ്യ സന്ദര്‍ശന രാജ്യമായ ഈജിപ്തിലെത്തിയ കിരീടാവകാശിക്ക് രാജോചിത സ്വീകരണമാണ് ലഭിച്ചത്.

സഊദി കിരീടാവകാശി മുഹമ്മദ് ബിന്‍ സല്‍മാന്റെ റോയല്‍ വിമാനത്തിന് യുദ്ധ വിമാനങ്ങള്‍ അകമ്പടി സേവിച്ചു.ഈജിപ്ത് അതിര്‍ത്തിയിലേക്ക് കടന്നയുടനെയാണ് സഊദി അറേബ്യയുടെ റോയല്‍ വിമാനത്തിന് ഈജിപ്ഷ്യന്‍ സൈനിക യുദ്ധ വിമാനങ്ങള്‍ അകമ്പടി സേവിച്ചത്.ഈജിപ്തിനുപുറമെ ബ്രിട്ടന്‍, അമേരിക്ക തുടങ്ങിയ രാജ്യങ്ങളും സന്ദര്‍ശിക്കുന്നുണ്ട്. ഫ്രാന്‍സ് സന്ദര്‍ശിക്കാനും സാധ്യതയുണ്ടെന്ന് സഊദി മാധ്യമങ്ങള്‍ റിപ്പോര്‍ട്ട് ചെയ്തു. ഞായറാഴ്ച രാത്രിയോടെ കെയ്‌റോയിലെത്തിയ കിരീടാവകാശിയെ പ്രോട്ടോക്കോള്‍ ലംഘിച്ച് വിമാനത്താവളത്തില്‍ എത്തിയാണ് ഈജിപ്ഷ്യന്‍ പ്രസിഡന്റ് സ്വീകരിച്ചത്.

തുടര്‍ന്ന് ഈജിപ്തിലെ മുതിര്‍ന്ന നേതാക്കളുമായി കൂടിക്കാഴ്ച നടത്തി. തെക്കന്‍ സിനായില്‍ നടപ്പാക്കുന്ന മെഗാ സിറ്റി പ്രൊജക്റ്റടക്കമുള്ള വിവിധ കരാറുകളില്‍ ഒപ്പിട്ടു.
സഊദിയുടെ സ്വപ്നപദ്ധതിയായ നിയോമുമായി ചേര്‍ന്ന് ഈജിപ്തില്‍ 1,000 സ്‌ക്വയര്‍ കിലോമീറ്ററിലാണ് നിക്ഷേപം നടത്തുക. പാരിസ്ഥിതിക സംരക്ഷണത്തിനായുള്ള കരാറുകളിലും ഒപ്പുവച്ചു. മേഖലയിലെ നിലവിലെ പ്രതിസന്ധികളും സുരക്ഷാമേഖലകളും ഈജിപ്ഷ്യന്‍ പ്രസിഡന്റുമായി ചര്‍ച്ച ചെയ്തു. കെയ്‌റോയിലെ ഇത്തിഹാദിയ രാജകൊട്ടാരത്തിലായിരുന്നു കൂടിക്കാഴ്ച. അമേരിക്കന്‍ സന്ദര്‍ശനത്തില്‍ ആണവകരാറില്‍ ഒപ്പുവയ്ക്കുമെന്നാണ് കരുതുന്നത്.

സഊദി ഇസ്‌ലാമികകാര്യ മന്ത്രി ശൈഖ് സ്വാലിഹ് അല്‍ അശൈഖ്, സഹമന്ത്രി ഡോ. ഉസാം ബിന്‍ സഈദ്, വാണിജ്യ നിക്ഷേപ മന്ത്രി ഡോ. മാജിദ് അല്‍ ഖസബി, വിദേശകാര്യ മന്ത്രി ആദില്‍ അല്‍ ജുബൈര്‍, ഇന്റലിജന്‍സ് മേധാവി ഖാലിദ് അല്‍ ഹുമൈദാന്‍, ആഫ്രിക്കന്‍ രാജ്യങ്ങള്‍ക്കുള്ള സഹമന്ത്രി അഹ്മദ് ഖത്താന്‍, സംയുക്ത സേനാ മേധാവി ജനറല്‍ ഫയാദ് അല്‍ റുവൈലി തുടങ്ങിയവര്‍ കിരീടാവകാശിയെ അനുഗമിക്കുന്നുണ്ട്.