ചേവായൂര്‍: മെഡിക്കല്‍ കോളജ് ആശുപത്രിയിലെ സര്‍ജറി ഒ.പിയില്‍ പ്രധാന ഡോക്ടറെ രോഗികള്‍ കാത്തിരുന്നത് അഞ്ചു മണിക്കൂര്‍. ആശുപത്രിയിലെ 63 ഒ.പിയില്‍ ഇന്നലെയാണ് സംഭവം.
രാവിലെ ഏഴോടെ ഒ.പി കൗണ്ടറിനു മുന്നില്‍ ക്യൂ നിന്ന് ടിക്കറ്റെടുത്ത് ചികിത്സാമുറിക്ക് മുന്നില്‍ കാത്തുനിന്ന നൂറുകണക്കിനു രോഗികളാണ് ദുരിതമനുഭവിച്ചത്. സര്‍ജറി ഒന്നാം യൂനിറ്റിലെ പ്രധാന ഡോക്ടറും ഈ വിഭാഗത്തിന്റെ തലവനുമായ ഡോ. ഇ.വി ഗോപിയാണ് മണിക്കൂറുകള്‍ രോഗികളെ ദുരിതത്തിലാക്കിയത്.
രണ്ട് ജൂനിയര്‍ ഡോക്ടര്‍മാര്‍ പരിശോധനയ്ക്ക് ഉണ്ടായിരുന്നെങ്കിലും സര്‍ജറിക്ക് തിയതി നിര്‍ദേശിക്കാനും അഡ്മിറ്റ് എഴുതാനും യൂനിറ്റ് ചീഫ് തന്നെ വേണം. യൂനിറ്റ് ചീഫിന് ഒ.പിയില്‍ എത്താന്‍ കഴിയാത്ത ദിവസം മറ്റു ഡോക്ടര്‍മാര്‍ക്ക് ചുമതല നല്‍കും.
എന്നാല്‍ ജൂനിയര്‍ ഡോക്ടര്‍മാര്‍ക്ക് ചുമതലയൊന്നും നല്‍കാതിരുന്നതാണ് രോഗികളെ കുഴക്കിയത്.
കാത്തിരുന്ന് മടുത്ത പല രോഗികളും ഡോക്ടറെ കാണാതെ മടങ്ങിപ്പോയി. ഡോക്ടര്‍ എപ്പോള്‍ വരുമെന്ന ചോദ്യത്തിന് ഇപ്പോള്‍ വരുമെന്നും കൗണ്‍സ ലിങ്ങിലാണെന്നുമായിരുന്നു അധികൃതര്‍ നല്‍കിയ മറുപടി.
അതേസമയം ഒ.പി ദിവസവും സര്‍ജറി ദിവസങ്ങളിലും കൗസലിങ്ങില്‍ നിന്ന് ഡോക്ടര്‍മാര്‍ മാറിനില്‍ക്കാറാണ് പതിവ്.
ഒരുമണിയോടെ ഡോക്ടറെത്തിയപ്പോഴാണ് അവശേഷിക്കുന്ന രോഗികള്‍ക്ക് അഡ്മിറ്റും സര്‍ജറിക്കുള്ള തിയതിയും നല്‍കിയത്. വാര്‍ഡിലും ഒ.പിയിലും രോഗികളെ പരിശോധിക്കുന്നതില്‍ അലംഭാവം കാണിക്കുന്ന യൂനിറ്റാണ് ഇതെന്നും ആരോപണമുണ്ട്.