ബാലുശ്ശേരി: കോക്കല്ലൂര്‍ ഗവ. ഹയര്‍ സെക്കന്‍ഡറി സ്‌കൂളില്‍ നടന്ന പ്രവേശനോത്സവത്തിന്റെ ജില്ലാതല ഉദ്ഘാടനം ശ്രദ്ധേയമായി. വിളംബരജാഥയും മധുരവിതരണവും കലാപരിപാടികളുമെല്ലാം പ്രവേശനോത്സവത്തെ ഗംഭീരമാക്കി. പ്രവേശനോത്സവ പതാക ഉയര്‍ത്തി നിയുക്ത എം.എല്‍.എ പുരുഷന്‍ കടലുണ്ടി ഉദ്ഘാടനം നിര്‍വഹിച്ചു.
ജില്ലാ പഞ്ചായത്ത് പ്രസിഡന്റ് ബാബു പറശ്ശേരി അധ്യക്ഷനായി. ജില്ലാ പഞ്ചായത്ത് വൈസ് പ്രസിഡന്റ് റീന മുണ്ടേങ്ങാട്ട് പ്രവേശനോത്സവസന്ദേശം നല്‍കി.
 വിദ്യാര്‍ഥികള്‍ക്കുള്ള യൂനിഫോം വിതരണം ജില്ലാ പഞ്ചായത്ത് വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍മാന്‍ മുക്കം മുഹമ്മദും കിറ്റ് വിതരണം പഞ്ചായത്ത് പ്രസിഡന്റ് പി.പി രവീന്ദ്രനാഥും നിര്‍വഹിച്ചു. ചടങ്ങില്‍ ഗവ. ടി.ടി.ഐയിലെ വിദ്യാര്‍ഥികള്‍ തയാറാക്കിയ 'എന്റെ പാപ്പാത്തി' ഹ്രസ്വചിത്രം റിലീസ് ചെയ്തു.
ഡി.ഡി.ഇ ഗിരീഷ് ചോലയില്‍, ഡയറ്റ് പ്രിന്‍സിപ്പല്‍ കെ. പ്രാഭാകരന്‍, ബ്ലോക്ക് പഞ്ചായത്ത് പ്രസിഡന്റ് വി. പ്രതിഭ, സ്‌കൂള്‍ പ്രിന്‍സിപ്പല്‍ എം.കെ ഗണേശന്‍, ഹെഡ്മാസ്റ്റര്‍ ഉണ്ണി, ഉപജില്ലാ വിദ്യാഭ്യാസ ഓഫിസര്‍ ഇ.കെ രാജന്‍, ബാലുശ്ശേരി ബി.പി.ഒ അബ്ദുല്‍ അഷ്‌റഫ്, ജില്ലാ പ്രൊജക്ട് ഓഫിസര്‍ കെ. വത്സന്‍, പി.ടി.എ പ്രസിഡന്റ് പി. പ്രമോദ്, വി.എച്ച്.എസ്.ഇ അസി. പ്രിന്‍സിപ്പല്‍ യു. കുഞ്ഞമ്മദ്, ബ്ലോക്ക് പഞ്ചായത്തംഗങ്ങളായ കെ. അഹമ്മദ് കോയ, എന്‍.പി ബാബു, എം.പി അജിത, കെ. ശ്രീജ, എന്‍.പി നിധീഷ്, യു.കെ സിറാജ്, വി.എം പ്രമീള പ്രസംഗിച്ചു.