ചെറുവത്തൂര്‍: പൊതുവിദ്യാഭ്യാസ സംരക്ഷണ യജ്ഞത്തിന്റെ ഭാഗമായി സംഘടിപ്പിച്ച ഹരിത വിദ്യാലയം റിയാലിറ്റി ഷോയില്‍ ജില്ലയ്ക്ക് അഭിമാനമായി ചന്തേര ഇസ്സത്തുല്‍ ഇസ്‌ലാം എ.എല്‍.പി സ്‌കൂള്‍. നൂറു വിദ്യാലയങ്ങള്‍ മത്സരിച്ച റിയാലിറ്റി ഷോയില്‍ മൂന്നാം സ്ഥാനം സ്വന്തമാക്കിയാണ് ഈ വിദ്യാലയം മികവു കാട്ടിയത്. കുട്ടികളുടെ എണ്ണം കുറഞ്ഞതിനെ തുടര്‍ന്ന് ഒരു കാലത്ത് ഈ വിദ്യാലയം അടച്ചു പൂട്ടലിന്റെ വക്കിലെത്തിയിരുന്നു. അക്കാദമിക മേഖലയ്ക്ക് ഊന്നല്‍ നല്‍കി വിദ്യാലയം സമൂഹത്തിലേക്കും സമൂഹം വിദ്യാലയത്തിലേക്കും എത്തിയ വൈവിധ്യമാര്‍ന്ന പ്രവര്‍ത്തനങ്ങളാണ് ഈ വിദ്യാലയത്തെ മുന്നോട്ട് നയിച്ചത്.
നാലു ലക്ഷം രൂപയും ട്രോഫിയും പ്രശസ്തി പത്രവുമാണ് വിദ്യാലയത്തിനു ലഭിച്ചത്. പ്രീ പ്രൈമറി വിഭാഗം ഉള്‍പ്പെടെ 305 കുട്ടികളാണ് ഇപ്പോള്‍ ഈ വിദ്യാലയത്തില്‍ പഠിക്കുന്നത്. പഠനത്തില്‍ പിന്നാക്കം നില്‍ക്കുന്ന കുട്ടികള്‍ക്കുള്ള പ്രത്യേക പഠനം പദ്ധതികള്‍, പഠനോപകരണങ്ങള്‍ തയാറാക്കുന്നതില്‍ അമ്മമാരുടെ പിന്തുണ, പൂര്‍വ വിദ്യാര്‍ഥികളുടെ പിന്തുണ ഉറപ്പാക്കാന്‍ വാട്‌സ് ആപ് ഗ്രൂപ്പ്, അധ്യാപകരും രക്ഷിതാക്കളും തമ്മിലുള്ള ആശയവിനിമയത്തിനു വാട്‌സ് ആപ് ഗ്രൂപ്പ്, പാതയോര കൃഷി, രക്ഷിതാക്കളുടെ സഹായത്തോടെയുള്ള പരിശീലന ക്ലാസുകള്‍, സാഹോദര്യം ഊട്ടിയുറപ്പിച്ചുള്ള ഓണം, പെരുന്നാള്‍, ക്രിസ്മസ് ആഘോഷങ്ങള്‍, രക്ഷിതാക്കളെ കൂടി ഉള്‍പ്പെടുത്തിയുള്ള ആഴ്ച നക്ഷത്രം മെഗാക്വിസ്, വിദ്യാലയ വികസന പ്രവര്‍ത്തനങ്ങള്‍ എന്നിവയെല്ലാം വിദ്യാലയത്തിന്റെ പ്രവര്‍ത്തന മികവിന്റെ അടയാളങ്ങളായി.
ചന്തേര മുസ്‌ലിം ജമാത്ത് കമ്മിറ്റിക്കു കീഴിലാണ് വിദ്യാലയം. നേട്ടം ആഘോഷമാക്കി മാറ്റാനുള്ള തയാറെടുപ്പിലാണ് നാട്.