നെടുങ്കണ്ടം: രണ്ട് കിലോ കഞ്ചാവുമായി മധ്യവയസ്‌കന്‍ എക്‌സൈസിന്റെ പിടിയിലായി. ആദിയാര്‍പൂരം കണ്ണങ്കേരില്‍ സുദര്‍ശനദാസ് (55) ആണ് അറസ്റ്റിലായത്.
കഴിഞ്ഞദിവസം രാത്രി തൂക്കുപാലം സ്വകാര്യ ബസ് സ്റ്റാന്‍ഡില്‍ കഞ്ചാവുമായി ബസ് കാത്തുനില്‍ക്കുന്നതിനിടെയാണ് പ്രതിയെ എക്‌സൈസ് സംഘം പിടികൂടിയത്. പ്രതി കഴിഞ്ഞ ദിവസം തമിഴ്‌നാട്ടിലെ കമ്പത്ത് നിന്ന് കഞ്ചാവ് വാങ്ങി രാമക്കല്‍മെട്ടിലെ സമാന്തരപാതയിലൂടെയാണ് അതിര്‍ത്തി കടന്നതെന്ന് എക്‌സൈസ് പറഞ്ഞു. കഴിഞ്ഞമാസവും പ്രതിയെ 50 ഗ്രാം കഞ്ചാവുമായി കട്ടപ്പന എക്‌സൈസ് സംഘം പിടികൂടിയിരുന്നു. ജാമ്യത്തില്‍ ഇറങ്ങിയശേഷം വീണ്ടും കഞ്ചാവ് കടത്തുന്നതായി എക്‌സൈസിനു വിവരം ലഭിച്ചതിനെ തുടര്‍ന്ന് ഒരാഴ്ചയായി ഇയാളുടെ നീക്കങ്ങള്‍ നിരീക്ഷിച്ച് വരുന്നതിനിടെയാണ് വീണ്ടും വലയിലായത്. കമ്പത്തെ കഞ്ചാവ് വില്‍പ്പന കേന്ദ്രത്തില്‍ നിന്ന് 25000 രൂപയ്ക്കാണ് രണ്ട് കിലോ കഞ്ചാവ് വാങ്ങിയതെന്നും എക്‌സൈസ് അറിയിച്ചു. ഉടുമ്പന്‍ചോല എക്‌സൈസ് റേഞ്ച് ഇന്‍സ്‌പെക്ടര്‍ എസ്.ഷാജി, എക്‌സൈസ് ഉദ്യോഗസ്ഥരായ ആസിഫ് അലി, ജോഫിന്‍,ഷാജി,രാധാകൃഷ്ണന്‍, ശശിന്ദ്രന്‍,രാജന്‍,ജോര്‍ജ്,കടകര,സേവ്യര്‍,ഷീജ എന്നിവരടങ്ങിയ സംഘമാണ് പ്രതിയെ പിടികൂടിയത്.