ഗസ്സ: ഫലസ്തീന്‍ പ്രധാനമന്ത്രി റാമി ഹംദുല്ലയുടെ വാഹനവ്യൂഹം ലക്ഷ്യമിട്ട് ആക്രമണം. പ്രധാനമന്ത്രിയും സംഘാംഗങ്ങളും തലനാരിഴയ്ക്കു വന്‍ ദുരന്തത്തില്‍നിന്നു രക്ഷപ്പെട്ടു. സംഭവത്തില്‍ അഞ്ചു സുരക്ഷാ ജീവനക്കാര്‍ക്കു നിസാരമായി പരുക്കേല്‍ക്കുകയും ചെയ്തിട്ടുണ്ട്. വടക്കന്‍ ഗസ്സയിലാണു സംഭവം. ബൈത്ത് ഹാനൂന്‍ എന്ന പേരില്‍ അറിയപ്പെടുന്ന ഇസ്‌റാഈലിന്റെ നിയന്ത്രണത്തിലുള്ള ഇറസ് ചെക്ക്‌പോയിന്റ് വഴി പ്രധാനമന്ത്രിയും സംഘവും കടന്നുപോകുമ്പോള്‍ സ്‌ഫോടകവസ്തു പൊട്ടിത്തെറിക്കുകയായിരുന്നു. ഇവിടെ മലിനജല ശുദ്ധീകരണകേന്ദ്രം ഉദ്ഘാടനം ചെയ്യാനെത്തിയതായിരുന്നു ഹംദുല്ല. ഫലസ്തീന്‍ രഹസ്യാന്വേഷണ വിഭാഗം മേധാവി മാജിദ് ഫറജും സംഘത്തിലുണ്ടായിരുന്നു.
ആക്രമണത്തെ ഫലസ്തീന്‍ പ്രസിഡന്റ് മഹ്മൂദ് അബ്ബാസ് അപലപിച്ചു. സംഭവം ഭീകരാക്രമണമാണെന്നും ഗസ്സയുടെ നിയന്ത്രണം കൈയാളുന്ന ഹമാസാണ് ആക്രമണം നടത്തിയതെന്നും അബ്ബാസിന്റെ ഫത്തഹ് പാര്‍ട്ടി ഇന്‍ഫര്‍മേ ഷന്‍ വിഭാഗം മേധാവി മുനീര്‍ അല്‍ ജാഗൂബ് ആരോപിച്ചു. ഇരുകക്ഷികളും തമ്മിലുള്ള അനുരഞ്ജനശ്രമങ്ങള്‍ക്കു തുരങ്കം വയ്ക്കാനുള്ള ശ്രമത്തിന്റെ ഭാഗമാണ് ആക്രമണമെന്നും അദ്ദേഹം പറഞ്ഞു.
എന്നാല്‍, ആരോപണങ്ങള്‍ ഹമാസ് തള്ളിക്കളഞ്ഞു. സംഭവത്തില്‍ തങ്ങള്‍ക്കെതിരേ ആരോപണമുന്നയിക്കുന്നതു രാഷ്ട്രീയപ്രേരിതമാണെന്ന് ഗസ്സ ആഭ്യന്തര മന്ത്രാലയം വക്താവ് ഇയാദ് അല്‍ ബൂസം കുറ്റപ്പെടുത്തി. സ്‌ഫോടനത്തെ കുറിച്ച് അന്വേഷണം ആരംഭിച്ചതായും കുറ്റവാളികളെ ഉടന്‍ കണ്ടെത്തുമെന്നും ഇയാദ് അറിയിച്ചു.
ഫലസ്തീനില്‍ വര്‍ഷങ്ങളായി പരസ്പര വൈരം തുടരുന്ന രാഷ്ട്രീയ കക്ഷികളാണ് ഹമാസും ഫത്തഹ് പാര്‍ട്ടിയും. യഥാക്രമം ഗസ്സയിലും വെസ്റ്റ് ബാങ്കിലും ഇരുകക്ഷികളും നടത്തുന്ന സമാന്തര ഭരണങ്ങള്‍ അവസാനിപ്പിച്ച് ഒറ്റ സര്‍ക്കാര്‍ രൂപീകരിക്കാന്‍ കഴിഞ്ഞ ഒക്ടോബറില്‍ തീരുമാനമായിരുന്നു. ഈജിപ്തിന്റെ നേതൃത്വത്തില്‍ നടന്ന അനുരഞ്ജന നടപടി ഇതുവരെ പ്രാബല്യത്തില്‍ വന്നിട്ടില്ല.