ഭുവനേശ്വര്‍: കരുത്തരായ നോര്‍ത്ത്ഈസ്റ്റ് യുനൈറ്റഡിനെ തകര്‍ത്ത് ഗോകുലം കേരള എഫ്.സി ഇന്ത്യന്‍ സൂപ്പര്‍ കപ്പിന്റെ പ്രീ ക്വാര്‍ട്ടറിലേക്ക് മുന്നേറി. മറുപടിയില്ലാത്ത രണ്ട് ഗോളുകള്‍ക്കാണ് യോഗ്യതാ പോരാട്ടത്തില്‍ ഗോകുലം വിജയം സ്വന്തമാക്കി സൂപ്പര്‍ കപ്പിന്റെ അവസാന 16ല്‍ സ്ഥാനമുറപ്പിച്ചത്. മറ്റൊരു മത്സരത്തില്‍ ഐ.എസ്.എല്‍ ടീം ഡല്‍ഹി ഡൈനാമോസും പുറത്തേക്കുള്ള വഴി കണ്ടു. ചര്‍ച്ചില്‍ ബ്രദേഴ്‌സാണ് ഡല്‍ഹി ടീമിനെ 2-1ന് അട്ടിമറിച്ചത്. സൂപ്പര്‍ കപ്പിന്റെ പ്രീ ക്വാര്‍ട്ടറില്‍ ഗോകുലം കരുത്തരായ ബംഗളൂരു എഫ്.സിയുമായും ചര്‍ച്ചില്‍ മോഹന്‍ ബഗാനുമായും ഏറ്റുമുട്ടും. ഗോകുലത്തിന്റെ വരവോടെ സൂപ്പര്‍ കപ്പില്‍ കേരളത്തിന് രണ്ട് പ്രതിനിധികളുമായി. കേരള ബ്ലാസ്റ്റേഴ്‌സ് നേരത്തെ തന്നെ സൂപ്പര്‍ കപ്പ് ബര്‍ത്ത് ഉറപ്പിച്ചിരുന്നു.
കളിയിലുടനീളം നോര്‍ത്ത്ഈസ്റ്റിനെ നിഷ്പ്രഭമാക്കിയാണ് ഗോകുലം മുന്നേറിയത്. ഇരു പകുതികളിലായി ഗോകുലത്തിന്റെ ഉഗാണ്ട താരം ഹെന്റി കിസേക നേടിയ ഗോളുകളാണ് കേരള ടീമിന് വിജയമൊരുക്കിയത്. 43, 74 മിനുട്ടുകളിലാണ് കിസേക ഇരട്ട ഗോളുകള്‍ വലയിലാക്കിയത്. തുടക്കം മുതല്‍ ആക്രമണ ഫുട്‌ബോളുമായി ഗോകുലം കളം നിറഞ്ഞപ്പോള്‍ നോര്‍ത്ത്ഈസ്റ്റ് നിഷ്പ്രഭമായി.
വില്ലിസ് പ്ലാസ നേടിയ ഇരട്ട ഗോളുകളുടെ മികവിലാണ് ചല്‍ച്ചില്‍ ഡല്‍ഹിയെ വീഴ്ത്തിയത്. ആറാം മിനുട്ടില്‍ കാലു ഉച്ചെയിലൂടെ മുന്നിലെത്തിയ ശേഷമാണ് ഡല്‍ഹി വീണുപോയത്. 34ാം മിനുട്ടില്‍ പ്ലാസയിലൂടെ ചര്‍ച്ചില്‍ സമനില പിടിച്ചു. പിന്നീട് നിശ്ചിത സമയത്ത് ഗോള്‍ പിറക്കാതെ വന്നതോടെ മത്സരം അധിക സമയത്തേക്ക് നീണ്ടു. അധിക സമയത്തിന്റെ 106ാം മിനുട്ടില്‍ പ്ലാസ തന്റെ രണ്ടാം ഗോളിലൂടെ ചര്‍ച്ചിലിന് വിജയം സമ്മാനിച്ചു.
ഇന്ന് നടക്കുന്ന അവസാന യോഗ്യതാ പോരാട്ടങ്ങളില്‍ മുംബൈ സിറ്റി- ഇന്ത്യന്‍ ആരോസുമായും എ.ടി.കെ- ചെന്നൈ സിറ്റിയുമായും ഏറ്റുമുട്ടും.