കോഴിക്കോട്: മുസ്‌ലിം ലീഗ് നേതാവും മുന്‍ കേന്ദ്രമന്ത്രിയുമായിരുന്ന ഇ.അഹമ്മദ് സ്മാരക സേവന രത്‌നപുരസ്‌കാരം എഴുത്തുകാരനും മാധ്യമപ്രവര്‍ത്തകനുമായ എം.ഐ. തങ്ങള്‍ക്ക്. വള്ളിക്കുന്ന് മണ്ഡലം സമാനമനസ്‌കര്‍ ഹരിത കൂട്ടായ്മ ഏര്‍പ്പെടുത്തിയ പുരസ്‌കാരം ജൂറി ചെയര്‍മാന്‍ എം.കെ. മുനീര്‍ എം.എല്‍.എയാണ് വാര്‍ത്താസമ്മേളനത്തില്‍ പ്രഖ്യാപിച്ചത്. മുസ്‌ലിം ലീഗ് സംസ്ഥാന വൈസ് പ്രസിഡന്റാണ് എം.ഐ തങ്ങള്‍. ചന്ദ്രിക ദിനപത്രത്തില്‍ എഡിറ്ററും, വര്‍ത്തമാനം ദിനപത്രം മുന്‍ എക്‌സിക്യൂട്ടീവ് എഡിറ്ററുമായിരുന്നു. ഒരു ലക്ഷം രൂപയും പ്രശസ്തി പത്രവുമടങ്ങുതാണ് പുരസ്‌കാരം. വാര്‍ത്താസമ്മേളനത്തില്‍ സുപ്രഭാതം എക്‌സിക്യൂട്ടിവ് എഡിറ്റര്‍ എ. സജീവന്‍, റസാഖ് മുന്നിയൂര്‍, സൈനുദ്ദീന്‍ തേഞ്ഞിപ്പലം, അഷ്‌റഫ് ചേലേമ്പ്ര എന്നിവര്‍ പങ്കെടുത്തു.