ഭീമവാരം (ആന്ധ്രാ പ്രദേശ്): ഫെഡറേഷന്‍ കപ്പ് ദേശീയ വോളിബോള്‍ പുരുഷ വിഭാഗം കിരീടം സ്വന്തമാക്കി ദേശീയ ചാംപ്യന്‍മാരായ കേരളം വീണ്ടും കരുത്തുകാട്ടി. ഫൈനലില്‍ റെയില്‍വേസിനെ നാല് സെറ്റ് നീണ്ട പോരാട്ടത്തില്‍ കീഴടക്കിയാണ് കേരളത്തിന്റെ പുരുഷ ടീം കിരീടം പിടിച്ചെടുത്തത്. അതേസമയം വനിതാ വിഭാഗത്തില്‍ കേരളം രണ്ടാം സ്ഥാനം കൊണ്ട് തൃപ്തിപ്പെട്ടു. നിരന്തരം റെയില്‍വേസിന് മുന്നില്‍ കീഴടങ്ങുന്ന പതിവ് ഇത്തവണയും കേരള വനിതകള്‍ ആവര്‍ത്തിച്ചു. സമാന രീതിയില്‍ തന്നെയാണ് ഇക്കഴിഞ്ഞ ദേശീയ പോരാട്ടത്തിലും വനിതകള്‍ ഫൈനലില്‍ തോല്‍വി വഴങ്ങിയത്.
ഏഴ് വര്‍ഷങ്ങള്‍ക്ക് ശേഷമാണ് പുരുഷ ടീമിന്റെ നേട്ടം. സ്‌കോര്‍: 25-18, 16-25, 25-23, 25-17. വനിതാ ഫൈനലില്‍ ആദ്യ സെറ്റ് നേടിയ ശേഷമാണ് കേരളം തോല്‍വി വഴങ്ങിയത്. സ്‌കോര്‍: 15-25, 25-23, 25-14, 25-15.
ടൂര്‍ണമെന്റിലെ മികച്ച സെറ്ററായി കേരളത്തിന്റെ മുത്തുസ്വാമിയും യുനിവേഴ്‌സലായി മനുവും മികച്ച ലിബറോയായി രതീഷ് സി.കെയും തിരഞ്ഞെടുക്കപ്പെട്ടു. ഭാവി താരത്തിനുള്ള പുരസ്‌കാരം യുനിവേഴ്‌സിറ്റീസിന്റെ ജിബിന്‍ സെബാസ്റ്റ്യന്‍ നേടി.