മാലി: പ്രതിഷേധം ശക്തമായതിനെ തുടര്‍ന്ന് മാലദ്വീപില്‍ അടിയന്തരാവസ്ഥ പിന്‍വലിച്ചു. 45 ദിവസമായി തുടരുന്ന അടിയന്തരാവസ്ഥ പ്രസിഡന്റ് അബ്ദുല്ല യമീനാണ് പിന്‍വലിച്ചത്. പ്രതിപക്ഷ പാര്‍ട്ടിയിലെ ഒന്‍പത് നേതാക്കള്‍ക്കെതിരേയുള്ള കുറ്റം സുപ്രിംകോടതി റദ്ദാക്കിയതിനെ തുടര്‍ന്ന് ഫെബ്രുവരി അഞ്ചിനാണ് അടിയന്തരാവസ്ഥ പ്രഖ്യാപിച്ചത്. 

രാജ്യത്ത് സാധാരണ ജീവിതം തുടരുന്നതിന്റെ ഭാഗമായിട്ടാണ് അടിയന്തരാവസ്ഥ പിന്‍വലിച്ചതെന്നും ദേശ സുരക്ഷക്ക് ഭീഷണിയാവുന്ന സാഹചര്യം ഇപ്പോഴുമുണ്ടെന്ന് അബ്ദുല്ല യമീന്‍ പറഞ്ഞു. മുന്‍ പ്രസിഡന്റ് മഅ്മൂന്‍ അബ്ദുല്‍ ഖയ്യൂമിനും സുപ്രിംകോടതി ജഡ്ജിമാര്‍ക്കുമെതിരേ സര്‍ക്കാര്‍ കഴിഞ്ഞ ദിവസം ഭീകരക്കുറ്റം ചുമത്തിയിരുന്നു. വിചാരണ കഴിയുന്നത് വരെ ഇവരെ കസ്റ്റഡിയില്‍വയ്ക്കാന്‍ മാലി കോടതി ഇന്നലെ ഉത്തരവിട്ടു. എന്നാല്‍ ഇവര്‍ക്കെതിരേ ഭീകരക്കുറ്റം ചുമത്താനുള്ള കാരണം പ്രോസിക്യൂട്ടര്‍ ഇതുവരെ വ്യക്തമാക്കിയിട്ടില്ല. ശിക്ഷിക്കപ്പെടുകയാണെങ്കില്‍ ഇവര്‍ക്കെതിരേ പത്ത് മുതല്‍ 15 വര്‍ഷം വരെ തടവ് ലഭിക്കാം.
അടിയന്തരാവസ്ഥയുടെ ആവശ്യം ഇപ്പോഴില്ലാത്തതിനാലാണ് അബ്ദുല്ല യമീന്‍ ഇത് പിന്‍വലിച്ചിരിക്കുന്നതെന്ന് മുന്‍ പ്രസിഡന്റ് മുഹമ്മദ് നഷീദ് ട്വീറ്റ് ചെയ്തു. ഇപ്പോള്‍ രാജ്യത്ത് ഏകാധിപത്യമാണ് നടക്കുന്നതെന്നും അനധികൃതമായി നൂറ് കണക്കിന് പേരെ അറസ്റ്റ് ചെയ്തുവെന്നുംഅദ്ദേഹം വ്യക്തമാക്കി.
രാജ്യത്തെ ജുഡിഷ്യറിയും നിയമ സംവിധാനവും തകര്‍ക്കപ്പെട്ടിരിക്കുകയാണെന്ന് മുഹമ്മദ് നഷീദ് പറഞ്ഞു. അടിയന്തരാവസ്ഥക്കെതിരേ തെരുവിലറങ്ങിയ നൂറ് കണക്കിന് പേരെ പൊലിസ് അറസ്റ്റ് ചെയ്തിട്ടുണ്ട്. ഇവരില്‍ നിരവധി പേരെ ഇതുവരെ വിട്ടയച്ചിട്ടില്ല. ഇന്ത്യ യു.എസ് ഉള്‍പ്പെടെയുള്ള രാജ്യങ്ങള്‍ അടയന്തരാവസ്ഥക്കെതിരേ നേരത്ത രംഗത്തുവന്നിരുന്നു.
ഉത്കണ്ഠകള്‍ നിലനില്‍ക്കുന്നുണ്ടെങ്കിലും അടിയന്തരാവസ്ഥ പിന്‍വലിച്ചതിനെ സ്വാഗതം ചെയ്യുന്നുവെന്ന് ഇന്ത്യ പറഞ്ഞു. രാജ്യത്തിന്റെ നീതി നിയമ സംവിധാനം പുനഃസ്ഥാപിക്കാന്‍ മാലദ്വീപ് സര്‍ക്കാര്‍ ശ്രമിക്കണമെന്ന് ഇന്ത്യന്‍ വിദേശകാര്യ മന്ത്രാലയം ആവശ്യപ്പെട്ടു. പൂര്‍ണ സ്വാതന്ത്ര്യം നടപ്പിലാക്കാന്‍ സുപ്രിംകോടതിയെയും മറ്റു കോടതികളെയും അനുവദിക്കണം.ഇതിനായി പ്രതിപക്ഷ പാര്‍ട്ടികള്‍ ഉള്‍പ്പെടെയുള്ളവരുമായി ചര്‍ച്ച നടത്തണമെന്നും വിദേശകാര്യമന്ത്രാലയം ആവശ്യപ്പെട്ടു.