തിരുവനന്തപുരം: വാട്‌സ്ആപ്പിലൂടെ ചോദ്യപേപ്പര്‍ പ്രചരിച്ചുവെന്ന് പരാതിയുയര്‍ന്ന പ്ലസ് ടു ഫിസിക്‌സ് പരീക്ഷ റദ്ദാക്കിയിട്ടില്ലെന്ന് ഹയര്‍ സെക്കന്‍ഡറി ഡയറക്ടര്‍ അറിയിച്ചു. പരീക്ഷ മാറ്റിവച്ചുവെന്ന രീതിയില്‍ പ്രചരിക്കുന്നത് വ്യാജ വാര്‍ത്തയാണ്. ഇത്തരം വാര്‍ത്തകള്‍ പ്രചരിപ്പിക്കുന്നവര്‍ക്കെതിരേ നടപടിയെടുക്കാന്‍ സൈബര്‍ സെല്ലിനോട് ആവശ്യപ്പെട്ടിട്ടുണ്ടെന്നും ഹയര്‍ സെക്കന്‍ഡറി ഡയറക്ടര്‍ കൂട്ടിച്ചേര്‍ത്തു. ബുധനാഴ്ച നടന്ന പ്ലസ് ടു ഫിസിക്‌സ് പരീക്ഷയുടെ ചോദ്യങ്ങള്‍ വാട്‌സ്ആപ്പിലൂടെ പ്രചരിച്ചതിനെത്തുടര്‍ന്ന് പൊലിസ് കേസെടുത്തിരുന്നു.
ഫിസിക്‌സ് പരീക്ഷയുടെ ചോദ്യങ്ങള്‍ മറ്റൊരു കടലാസില്‍ പകര്‍ത്തി എഴുതിയതിന്റെ ചിത്രമാണ് വാട്‌സ്ആപ്പില്‍ പ്രചരിച്ചത്. പ്രാഥമിക പരിശോധനയില്‍ ചോദ്യങ്ങള്‍ യഥാര്‍ഥമാണെന്ന് കണ്ടെത്തി. തുടര്‍ന്നാണ് ഹയര്‍സെക്കന്‍ഡറി ഡയറക്ടര്‍ പൊലിസ് മേധാവി ലോക്‌നാഥ് ബെഹ്‌റയ്ക്ക് പരാതി നല്‍കിയത്. ഡി.ജി.പിയുടെ നിര്‍ദേശപ്രകാരം സൈബര്‍ ക്രൈം സ്റ്റേഷനില്‍ കേസ് രജിസ്റ്റര്‍ ചെയ്തു. പരീക്ഷയ്ക്ക് മുന്‍പാണോ ശേഷമാണോ വാട്‌സ് ആപ്പ് സന്ദേശം പ്രചരിച്ചത് എന്നാണ് സൈബര്‍ പൊലിസ് മുഖ്യമായും അന്വേഷിക്കുന്നത്.