പൈരിയ: കേരള കേന്ദ്ര സര്‍വകലാശാല മെസുകളിലെ അടുക്കള പ്രശ്‌നത്തിനു താല്‍ക്കാലിക പരിഹാരമായി. ജില്ലാ കലക്ടറും കാഞ്ഞങ്ങാട് ആര്‍.ഡി.ഒയുംസര്‍വകലാശാല ഉദ്യോഗസ്ഥരും വിദ്യാര്‍ഥി പ്രതിനിധികളും ഇന്നലെ ചര്‍ച്ച നടത്തിയതിനെ തുടര്‍ന്നാണ് പ്രശ്‌നത്തിനു താല്‍ക്കാലിക പരിഹാരമായത്. ഇതേ തുടര്‍ന്ന് ആറു ദിവസമായി വിദ്യാര്‍ഥികള്‍ നടത്തി വന്നിരുന്ന നിരാഹാര സമരം പിന്‍വലിച്ചു. വ്യവസ്ഥ പ്രകാരം സര്‍വകലാശാല അധികൃതര്‍ കാംപസിലെ മൂന്നു ഹോസ്റ്റല്‍ മെസുകളില്‍ നിന്നായി 15 കരാര്‍ ജീവനക്കാരെ ഒഴിവാക്കി പുറംകരാര്‍ നല്‍കുന്നതിനു പകരം ഒഴിവാക്കുന്ന ജീവനക്കാര്‍ക്കു പകരമായി കേന്ദ്ര സര്‍വകലാശാല ഗസ്റ്റ് ഹൗസുകളിലുള്ള മൂന്നു അടുക്കള ജീവനക്കാരെ ഹോസ്റ്റല്‍ മെസ്സുകളിലേക്കു നിയമിക്കാനുള്ള തീരുമാനം കൈകൊണ്ടു.
രണ്ടു മാസത്തിനകം വിശദമായി ഇതര സംസ്ഥാനങ്ങളില്‍ പ്രവര്‍ത്തിക്കുന്ന കേന്ദ്ര സര്‍വ കലാശാലകളില്‍ നിന്ന് അടുക്കള ജീവനക്കാരുടെ നിയമനവുമായി ബന്ധപ്പെട്ട വിവരം ശേഖരിക്കാനും തുടര്‍ന്നു ശ്വാശ്വതമായി പ്രശ്‌നം പരിഹരിക്കാനും യോഗത്തില്‍ ധാരണയായി.
ആദ്യ ദിവസങ്ങളില്‍ നാലും പിന്നീട് അഞ്ചും വിദ്യാര്‍ഥികള്‍ നടത്തി വന്നിരുന്ന നിരാഹാര സമരത്തെ സര്‍വകലാശാല അധികൃതര്‍ ഗൗനിക്കാതെ വന്നതിനെ തുടര്‍ന്നു വിദ്യാര്‍ഥികള്‍ സമരം കടുപ്പിച്ചിരുന്നു. ഇതേ തുടര്‍ന്നു കഴിഞ്ഞ ദിവസം മുതല്‍ 30 വിദ്യാര്‍ഥികള്‍ വരെ സമര രംഗത്തിറങ്ങി. ഇതിനിടയില്‍ വിദ്യാര്‍ഥികളുടെ സമരത്തെ അനുകൂലിച്ചു കെ.എസ്.യു ഉള്‍പ്പെടെയുള്ള യുവജന സംഘടനകളും രംഗത്തു വന്നതോടെ അടുക്കള പ്രശ്‌നം കത്താന്‍ തുടങ്ങി.
കഴിഞ്ഞ ദിവസം നിരാഹാര സമരത്തിനിടെ തളര്‍ന്നു വീണ ഒരു കൂട്ടം വിദ്യാര്‍ഥികളെ ആശുപത്രിയില്‍ പ്രവേശിപ്പിച്ചതോടെ ജില്ലാ ഭരണാധികാരികളും ഉണര്‍ന്നു. ഇതേ തുടര്‍ന്നാണ് ഇന്നലെ ജില്ലാ കലക്ടര്‍ കെ. ജീവന്‍ ബാബു, കാഞ്ഞങ്ങാട് ആര്‍.ഡി.ഒ ബിജു, സര്‍വകലാശാല വൈസ് ചാന്‍സിലര്‍ ജി. ഗോപകുമാര്‍, രജിസ്ട്രാര്‍, കണ്‍ട്രോളര്‍, വിദ്യാര്‍ഥി പ്രതിനിധികള്‍ എന്നിവരുള്‍പ്പെടെയുള്ളവര്‍ ചര്‍ച്ച നടത്തിയത്. രണ്ടു മണിക്കൂറിലധികം ചര്‍ച്ച നടത്തിയാണു പ്രശ്‌നത്തിന് പരിഹാരം കണ്ടത്.