പാലക്കാട്: മലമ്പുഴ കോഴിമലകുന്നില്‍ എട്ടും, ആറും വയസ് പ്രായം തോന്നിക്കുന്ന രണ്ടു പുളളിപുലികളെ ചത്ത നിലയില്‍ കണ്ടെത്തി. രണ്ടു ദിവസത്തെ പഴക്കം വരും. ആണ്‍പുലിയുടെ ജഡം കോഴിമലയിലെ മാളത്തിനടുത്തും പെണ്‍പുലിയുടേത് തൊട്ടുതാഴെ മലമ്പുഴ ഡാമിനകത്തുമായാണ് കാണപ്പെട്ടത്.
കോഴിമലയില്‍ തേന്‍ ശേഖരിക്കാന്‍ പോയ ആദിവാസികളാണ് പുലികള്‍ ചത്ത നിലയില്‍ കണ്ടത്. വിഷം കലര്‍ന്ന ഭക്ഷണം തിന്നതാണ് മരണത്തിനു കാരണമെന്നാണ് വനം വകുപ്പിന്റെ പ്രാഥമിക നിഗമനം. കാലങ്ങളായി കോഴിമലയിലും പരിസരങ്ങളിലുമായി ഈ ഇണപ്പുലികള്‍ കറങ്ങി നടപ്പുണ്ടെങ്കിലും ജനങ്ങളെ ഉപദ്രവിച്ചതായി വിവരമില്ല. എന്നാല്‍, മലമ്പുഴ ഡാമിനകത്ത് അനധികൃതമായി മേയാന്‍ വിടുന്ന ആടുകളെയും, പശുക്കുട്ടികളെയും ഇവ പിടിച്ചതായി നേരത്തെ നാട്ടുകാര്‍ പരാതിപെട്ടിരുന്നു.
വളര്‍ത്തുന്ന മൃഗങ്ങളെ പിടിക്കുന്നതില്‍ പ്രതിക്ഷേധിച്ച് ആരോ വിഷം വച്ചതാവാമെന്ന സംശയവുമുയര്‍ന്നിട്ടുണ്ട്. ആടിനെ പിടിച്ചു തിന്നതിനു ശേഷം അതിനകത്ത് തുരിശ് പോലുള്ള വിഷം വച്ചിരിക്കാം.
പുലികള്‍ വീണ്ടും തിന്നതാവാം മരണകാരണം. ഡാമിനകത്തും പരിസരങ്ങളിലുമായി ധാരാളം വളര്‍ത്തു മൃഗങ്ങളെ മേയാന്‍ വിടുന്നത് പതിവാണ്. ഇതിനെതിരേ ജലസേചനവകുപ്പ് നടപടിയെടുക്കാറില്ല. കോഴിമല കുന്നിന്റെ താഴ്‌വാരത്തെ തുരുത്തുകളില്‍ ആയിരകണക്കിന് പോത്തുകളെ വളര്‍ത്താനും വിടുന്നുണ്ട്. ഇവ പിടിച്ചു തിന്നതിലുള്ള പ്രതിഷേധം തീര്‍ക്കാന്‍ പുലികളെ വിഷം വച്ചിരിക്കാനുമിടയുണ്ട്.
രണ്ടു വര്‍ഷം മുന്‍പ് കവക്കടുത്ത് വിഷംവച്ച് ഒരു പുള്ളിപ്പുലിയെ കൊന്നിരുന്നു. ആറ് വര്‍ഷം മുന്‍പും കോഴിമലക്കടുത്ത് ചത്ത ആടിന്റെ ശരീരത്തില്‍ വിഷം കലര്‍ത്തുകയും അത് തിന്ന് മൂന്ന് പുള്ളിപുലികള്‍ ചത്തിരുന്നു.
ഇതോടെ ഇപ്രദേശത്ത് ആറ് പുള്ളിപുലികള്‍ ചത്തു. എന്നാല്‍ ഇത് സംബന്ധിച്ച് വനം വകുപ്പ് അന്വേഷണം ഒന്നും നടന്നിട്ടുമില്ല. കൊട്ടേക്കാട് സെക്ഷന്റെ പരിധിയിലാണ് കോഴിമല കുന്ന് വരുന്നത്.
ഈ പ്രദേശം വേട്ടക്കാരുടെ താവളവുമാണ്. കാട്ടുപന്നികളെ കെണിവച്ചും നാടന്‍പടക്കും ഉപയോഗിച്ചും കൊല്ലുന്ന സംഘങ്ങള്‍ വിലസുകയാണ്. ഒരാഴ്ച മുന്‍പ് മലമ്പുഴ കൃഷി ഫാമിനകത്ത് കെണിവച്ച് കാട്ടുപന്നിയെ കൊന്നിരുന്നു. അതിനു തൊട്ടു പിന്നാലെയാണ് രണ്ടു പുള്ളിപുലികളെ ഇപ്പോള്‍ കൊന്നത്.
ഇന്നലെ രാവിലെ വനംവകുപ്പ് വെറ്ററിനറി ഡോക്ടര്‍ മിഥുന്‍, മലമ്പുഴ വെറ്ററിനറി ഡോക്ടര്‍ ആശ വിന്‍സെന്റ്, ഡോ.ശ്രീറാം, അഡ്വ. നമഃശിവായം എന്നിവരുടെനേതൃത്വത്തിന്‍ പോസ്റ്റ് മോര്‍ട്ടും നടത്തി. പാലക്കാട് സി.സി.എഫ് അടലരസന്‍, ഡി.എഫ്.ഒ നരേന്ദ്രനാഥ് വേളൂരി, വാളയാര്‍ റെയ്ഞ്ച് ഓഫിസര്‍ സി. ഷെരീഫ് ഇന്‍ക്വസ്റ്റ് നടത്തി.
വിശദ പരിശോധനക്കായി സാമ്പിള്‍ എടുത്ത് കൊച്ചിയിലെ ലാബിലേക്കയച്ചതായും ഫലം വന്നതിനു ശേഷമേ മരണകാരണം വ്യക്തമാക്കാന്‍ പറ്റുവെന്ന് പാലക്കാട് ഡി.എഫ്.ഒ പറഞ്ഞു. എന്നാല്‍ പുലികളുടെ മരണത്തില്‍ ദുരൂഹതയുള്ളതിനാല്‍ ഫോട്ടോയോ, മറ്റു വിവരങ്ങളോ പുറത്താക്കരുതെന്ന് വനം വകുപ്പ് മേലുദ്യോഗസ്ഥര്‍ കര്‍ശന നിര്‍ദേശം നല്‍കിയിട്ടുണ്ട്.