തൃശൂര്‍: തൃശൂര്‍ പൂരത്തോടനുബന്ധിച്ചു ഓരോ വര്‍ഷവും നടത്തിവരാറുള്ള അഖിലേന്ത്യാ കാര്‍ഷിക വ്യവസായ വിദ്യാഭ്യാസ പ്രദര്‍ശനം (തൃശൂര്‍ പൂരം പ്രദര്‍ശനം) ഇത്തവണ ഏപ്രില്‍ ഒന്നിനു ഉദ്ഘാടനം ചെയ്യും. ഏപ്രില്‍ അഞ്ചു മുതലാണു സന്ദര്‍ശകര്‍ക്കു പ്രവേശനമനുവദിക്കുക. മെയ് 31 വരെ നീണ്ടുനില്‍ക്കും. രാവിലെ 10 മുതല്‍ രാത്രി ഒമ്പതു വരെയാണു പ്രദര്‍ശന സമയം. വടക്കുന്നാഥന്‍ ക്ഷേത്രത്തിന്റെ വടക്കു കിഴക്കു ഭാഗത്തായി നടക്കുന്ന പ്രദര്‍ശനം ഒന്നിനു വൈകിട്ട് അഞ്ചിനു പ്രദര്‍ശന ഗ്രൗണ്ടിലെ ഓഡിറ്റോറിയത്തില്‍ വ്യവസായ വകുപ്പ് മന്ത്രി എ.സി മൊയ്തീന്‍ ഉദ്ഘാടനം ചെയ്യും. കൃഷി വകുപ്പ് മന്ത്രി വി.എസ് സുനില്‍കുമാര്‍ അധ്യക്ഷനാകും. കോര്‍പ്പറേഷന്‍ മേയര്‍ അജിത ജയരാജന്‍ മുഖ്യാതിഥിയാവും. സി.എന്‍ ജയദേവന്‍ എം.പി മുഖ്യ പ്രഭാഷണം നടത്തും.
ജില്ലാ പഞ്ചായത്ത് പ്രസിഡന്റ് മേരി തോമസ്, കൊച്ചിന്‍ ദേവസ്വം ബോര്‍ഡ് പ്രസിഡന്റ് ഡോ. എം.കെ സുദര്‍ശന്‍, കോര്‍പ്പറേഷന്‍ പ്രതിപക്ഷ നേതാവ് എം.കെ മുകുന്ദന്‍, ദേവസ്വം ബോര്‍ഡ് മെമ്പര്‍മാരായ ടി.എന്‍ അരുണ്‍കുമാര്‍, കെ.എന്‍ ഉണ്ണികൃഷ്ണന്‍, കൗണ്‍സിലര്‍മാരായ എം.എസ് സമ്പൂര്‍ണ, കെ മഹേഷ് ആശംസകളര്‍പ്പിക്കും. 190 ല്‍ പരം സ്റ്റാളുകളും 60 ഓളം പവലിയനുകളുമാണു ഈ വര്‍ഷം പ്രദര്‍ശന നഗരിയില്‍ സജ്ജീകരിക്കുന്നത്.
ഐ.എസ്.ആര്‍.ഒ, ബി.എസ്.എന്‍.എല്‍, കയര്‍ ബോര്‍ഡ്, കേരള ഖാദി ഗ്രാമ വ്യവസായ അസോസിയേഷന്‍, ഫാം ഇന്‍ഫര്‍മേഷന്‍ ബ്യൂറോ, ഐ ആന്‍ഡ് പി.ആര്‍.ഡി, വൈദ്യുതി ബോര്‍ഡ്, കേരള പൊലിസ്, എക്‌സൈസ് വകുപ്പ്, ജില്ലാ പഞ്ചായത്ത് കാര്‍ഷിക സര്‍വകലാശാല, ഹോമിയോ വകുപ്പ് തുടങ്ങിയവ പവലിയനൊരുക്കുന്നുണ്ട്. ജൂബിലി മിഷന്‍ മെഡിക്കല്‍ കോളജിന്റെ പ്രത്യേക ആരോഗ്യ പവലിയനും ഗുരുവായൂര്‍ ദേവസ്വത്തിന്റെ പവലിയനുമുണ്ടാകും. ഇതിനു പുറമെ സ്വകാര്യ സ്ഥാപനങ്ങളുടെ പവലിയനുകളുമുണ്ട്. കുട്ടികള്‍ക്കായി വിനോദാപാധികളുടെ വിപുലമായ സംവിധാനവും ഒരുക്കിയിട്ടുണ്ട്.
ദിവസം തോറും വൈകിട്ടു നാടകമടക്കമുള്ള കലാപരിപാടികളും അരങ്ങേറും. കൊച്ചിന്‍ ദേവസ്വം ബോര്‍ഡിനു നല്‍കിവരുന്ന വാടക ഈ വര്‍ഷം 20 ലക്ഷം രൂപയായി വര്‍ധിപ്പിച്ചിട്ടുണ്ട്. വാഹന പാര്‍ക്കിംഗിനുള്ള നടത്തിപ്പവകാശവും ബോര്‍ഡിനാണെന്നു ഭാരവാഹികള്‍ വാര്‍ത്താ സമ്മേളനത്തില്‍ പറഞ്ഞു. സാധാരണ ദിവസങ്ങളില്‍ 20 രൂപയും പൂരത്തോടനുബന്ധിച്ച മൂന്നു ദിവസങ്ങളില്‍ 30 രൂപയുമാണു പ്രവേശന ടിക്കറ്റിനു ഈടാക്കുക. എന്നാല്‍ ജി.എസ്.ടി വന്നതിനു ശേഷം പ്രദര്‍ശനത്തിനു നികുതിയിളവ് നല്‍കാന്‍ നഗരസഭക്കോ സംസ്ഥാന സര്‍ക്കാരിനോ അനുവാദമില്ലാത്ത സാഹചര്യമാണുള്ളത്. ജി.എസ്.ടി ബാധകമാണെങ്കില്‍ നിരക്കു വര്‍ധിപ്പിക്കേണ്ടി വരും. ഈ വര്‍ഷം ടിക്കറ്റ് സംവിധാനം പൂര്‍ണമായും കമ്പ്യൂട്ടറൈസ്ഡ് ആയിരിക്കുമെന്നും സംഘാടകര്‍ പറഞ്ഞു. പ്രദര്‍ശന കമ്മിറ്റി ഭാരവാഹികളായ പി രാധാകൃഷ്ണന്‍, പ്രൊഫ. പി ചന്ദ്രശേഖരന്‍, ജി രാജേഷ്, കെ ബി ശശിധരന്‍, എം രവികുമാര്‍ വാര്‍ത്താ സമ്മേളനത്തില്‍ സംബന്ധിച്ചു.