അസാധു നോട്ടുകള്‍ സാധുവാക്കാന്‍ വേണ്ടി അയാള്‍ മകളുടെ ബാങ്ക് അക്കൗണ്ടിലിട്ടു. പിറ്റേന്നു മുതല്‍ പുതിയ നോട്ടുകള്‍ക്കു വേണ്ടി മകള്‍ ബാങ്കിനു മുന്നില്‍ ക്യൂ നിന്നു. ഒരു ദിവസം ബാങ്ക് ഓഫിസര്‍ അവളുടെ വിരലില്‍ ചാപ്പ കുത്തി. വിരലില്‍നിന്നും മഷി ഹൃദയത്തിലേക്കു പരന്നൊഴുകി. ചാപ്പ കുത്തിയ നഖം കടിച്ചവള്‍ പിറ്റേന്നും ബാങ്കിലെത്തി. മാറിക്കിട്ടിയ ഓരോ പുതിയ നോട്ടുകളിലും അവള്‍ ഓഫിസറുടെ മുഖം തെളിഞ്ഞുകണ്ടു. പിന്‍വലിച്ച നോട്ടുകളത്രയും അവള്‍ വീണ്ടും വീണ്ടും അക്കൗണ്ടിലിട്ടു.

അസാധുനോട്ടിലൂടെ മകള്‍ക്കൊരു ചെറുക്കനെ കിട്ടിയതില്‍ സാധുവായ അച്ഛന്‍ രണ്ടായിരത്തിന്റെ നോട്ടുകള്‍ മാറിക്കിട്ടിയ പോലെ സന്തോഷിച്ചു.
അച്ഛന് ഒരു 'അച്ഛാദിന്‍' വന്നെത്തിയതില്‍ മകളും സന്തോഷിച്ചു.