ജൊഹന്നാസ്ബര്‍ഗ്: ദക്ഷിണാഫ്രിക്കയ്‌ക്കെതിരായ നാലാം ക്രിക്കറ്റ് ടെസ്റ്റിലും ആസ്‌ത്രേലിയ തകരുന്നു. ഒന്നാം ഇന്നിങ്‌സില്‍ 488 റണ്‍സെന്ന മികച്ച സ്‌കോര്‍ നേടിയ ദക്ഷിണാഫ്രിക്കയ്‌ക്കെതിരേ ഒന്നാം ഇന്നിങ്‌സ് തുടങ്ങിയ ഓസീസ് ആറ് വിക്കറ്റ് നഷ്ടത്തില്‍ 110 റണ്‍സെന്ന നിലയില്‍. നാല് വിക്കറ്റുകള്‍ ശേഷിക്കേ ആതിഥേയ സ്‌കോറിനൊപ്പമെത്താന്‍ സന്ദര്‍ശകര്‍ക്ക് ഇനിയും 378 റണ്‍സ് വേണം.
രണ്ടാം ദിനം കളി നിര്‍ത്തുമ്പോള്‍ ക്യാപ്റ്റന്‍ ടിം പെയ്ന്‍ (അഞ്ച്), പാറ്റ് കമ്മിന്‍സ് (ഏഴ്) എന്നിവരാണ് ക്രീസില്‍. മുന്‍നിരയില്‍ ഉസ്മാന്‍ ഖവാജ (53) മാത്രമാണ് പിടിച്ചുനിന്നത്. മൂന്ന് വിക്കറ്റുകള്‍ വീഴ്ത്തി വെര്‍നോന്‍ ഫിലാന്‍ഡര്‍ ഓസീസ് തകര്‍ച്ച എളുപ്പമാക്കി. റബാഡ, മോര്‍കല്‍, കേശവ് മഹാരാജ് എന്നിവര്‍ ഓരോ വിക്കറ്റെടുത്തു.
നേരത്തെ എയ്ഡന്‍ മാര്‍ക്രം (152) നേടിയ സെഞ്ച്വറിയുടെ കരുത്തില്‍ കുതിച്ച ദക്ഷിണാഫ്രിക്കയ്ക്കായി എ.ബി ഡിവില്ല്യേഴ്‌സ് (69) അര്‍ധ സെഞ്ച്വറി നേടി. പിന്നീട് മധ്യനിരയില്‍ പുറത്താകാതെ 95 റണ്‍സെടുത്ത ടംബ ബവുമയുടെ അവസരോചിത ഇന്നിങ്‌സാണ് ദക്ഷിണാഫ്രിക്കയെ മികച്ച സ്‌കോറിലേക്ക് നയിച്ചത്. കേശവ് മഹാരാജ് (45), ക്വിന്റന്‍ ഡി കോക്ക് (39) എന്നിവര്‍ ബവുമയെ പിന്തുണച്ചു. ഓസീസിനായി പാറ്റ് കമ്മിന്‍സ് അഞ്ചും നതാന്‍ ലിയോണ്‍ മൂന്നും വിക്കറ്റുകള്‍ പിഴുതു.