കണ്ണൂര്‍: സഹനം, സമരം, സമര്‍പ്പണം എന്ന പ്രമേയത്തില്‍ സംഘടിപ്പിക്കുന്ന റമദാന്‍ ക്യാംപയിന്റെ ജില്ലാതല ഉദ്ഘാടനം ഇന്ന് വൈകിട്ട് ഏഴിന് നൂഞ്ഞേരി നൂറുല്‍ ഇസ്‌ലാം മദ്‌റസയില്‍ സമസ്ത വൈസ് പ്രസിഡന്റ് പി.കെ.പി അബ്ദുസ്സലാം മുസ്‌ല്യാര്‍ ഉദ്ഘാടനം ചെയ്യും. റമദാന്‍ ക്യാംപയിനോടനുബന്ധിച്ച് ഒരു ദിനം ഒരു തിരുവചനം, ഖുര്‍ആന്‍ മെസേജ് പ്രോഗ്രാം, ഖുര്‍ആന്‍ ടാലന്റ് ടെസ്റ്റ്, ബദര്‍ ദിന പ്രഭാഷണം, സക്കാത്ത് സെമിനാര്‍, ഇഫ്ത്തിക്കാഫ് ജല്‍സ, തസ്‌കിയത്ത് ക്യാംപുകള്‍, ഇഫ്ത്താര്‍ സംഗമം തുടങ്ങിയ പരിപാടികളാണ് ഇത്തവണ ജില്ലയില്‍ സംഘടിപ്പിക്കുന്നത്. ഉദ്ഘാടനച്ചടങ്ങില്‍ അഹ്മദ് തേര്‍ളായി പ്രമേയ പ്രഭാഷണം നടത്തും. ബഷീര്‍ അസ്അദി നമ്പ്രം അധ്യക്ഷനാകും. എ.കെ അബ്ദുല്‍ ബാഖി, സലാം ദാരിമി കിണവക്കല്‍, ലത്തീഫ് മാസ്റ്റര്‍, അബ്ദുല്‍ ഗഫൂര്‍ ബാഖവി, റഹ്മത്തുള്ള പുല്ലൂപ്പി, സുഹൈല്‍ ദാരിമി സംസാരിക്കും. ജുനൈദ് ചാലാട് സ്വാഗതം പറയും. റമദാന്‍ ക്യാംപയിന്‍ ജില്ലാതല ഉദ്ഘാടനം വിജയിപ്പിക്കണമെന്ന് മേഖലാ പ്രസിഡന്റ് റഹ്മത്തുള്ള മൗലവിയും സെക്രട്ടറി നസീര്‍ ദാരിമിയും അഭ്യര്‍ഥിച്ചു.