റിയാദ്: സഊദിയിലെ നജ്‌റാനില്‍ നിയന്ത്രണം വിട്ട ട്രക്ക് ഷോപ്പിങ് മാളിലേക്ക് ഇടിച്ചുകയറി മലയാളി ഉള്‍പ്പെടെ മൂന്നുപേര്‍ വെന്തു മരിച്ചു. നഗരത്തിന് പടിഞ്ഞാറ് ഭാഗത്താണ് അപകടം. ട്രക്ക് ഡ്രൈവറും രണ്ട് ജോലിക്കാരുമാണ് വെന്തു മരിച്ചത്. കോഴിക്കോട് മോരിക്കര മനക്കല്‍ നിഖില്‍ സുരേന്ദ്രന്‍ (40) ആണ് മരിച്ച മലയാളി. മരിച്ച മറ്റു രണ്ടു പേര്‍ തമിഴ്‌നാട് സ്വദേശികളാണ്. ഇന്ത്യക്കാരന്‍ ഉള്‍പ്പെടെ രണ്ടു പേര്‍ക്ക് പരുക്കേല്‍ക്കുകയും ചെയ്തു.
ടൈല്‍സ് കയറ്റി വരുന്ന ട്രക്ക് പാലത്തിനു മുകളില്‍ നിന്നും ഇറങ്ങുന്നതിനിടെ നിയന്ത്രണം വിട്ട് സമീപത്തെ ഷോപ്പിങ് മാളിലേക്ക് ഇടിച്ചുമറിയുകയായിരുന്നു.
അതേസമയം, ഈ ഭാഗത്തു നിന്ന് വന്‍ സ്‌ഫോടന ശബ്ദം കേട്ടതായും യമനിലെ ഹൂതി മലീഷികളുടെ ഷെല്‍ ആക്രമണമാണ് തീപിടിത്തത്തിന് കാരണമെന്നും സ്ഥിരീകരിക്കാത്ത റിപ്പോര്‍ട്ടുകളുണ്ട്. ഇതേദിവസം ഇവിടെ ഷെല്‍ ആക്രമണത്തില്‍ ഇന്ത്യക്കാരനു പരുക്കേറ്റിരുന്നു.