മിലാന്‍: ഇറ്റാലിയന്‍ സീരി എ പോരാട്ടത്തില്‍ യുവന്റസ് കുതിപ്പ് തുടരുന്നു. നാപോളിയുടെ കിരീട മോഹങ്ങള്‍ തല്ലിക്കെടുത്തിയാണ് യുവന്റസിന്റെ മുന്നേറ്റം. ഇന്നലെ നടന്ന മത്സരത്തില്‍ യുവന്റസ് ഒന്നിനെതിരേ മൂന്ന് ഗോളുകള്‍ക്ക് മിലാനെ തകര്‍ത്തതോടെ നാപോളിയുടെ കിരീട പ്രതീക്ഷക്ക് മേല്‍ കരിനിഴല്‍ വീണു. യുവന്റസിന് വേണ്ടി ഡിബാല (എട്ട്), ക്വഡ്രാഡോ (79), ഖെദീര (87) എന്നിവര്‍ ഗോള്‍ നേടി. 28ാം മിനുട്ടില്‍ ബൊനൂസിയിലൂടെ മിലാന്‍ ഒരു ഗോള്‍ മടക്കി. ദുര്‍ബലരായ സസോലോയോട് സമനില വഴങ്ങിയതാണ് നാപോളിക്ക് തിരിച്ചടിയായത്. 30 കളികളില്‍ നിന്ന് 25 ജയവും മൂന്ന് സമനിലയും രണ്ട് തോല്‍വിയുമടക്കം യുവന്റസിന് 78 പോയിന്റാണുള്ളത്. ഇത്ര തന്നെ മത്സരങ്ങളില്‍ നിന്ന് 23 ജയവും അഞ്ച് സമനിലയും രണ്ട് തോല്‍വിയുമായി 74 പോയിന്റോടെ തൊട്ടുപിന്നില്‍ തന്നെയുണ്ടെങ്കിലും നാപോളിക്ക് യുവന്റസിനെ മറികടക്കുകയെന്നത് പ്രയാസമായിരിക്കും.