ആലക്കോട്: കാപ്പിമലയില്‍ കടുവയുടെ ആക്രമണത്തില്‍ നിരവധി വളര്‍ത്തു മൃഗങ്ങള്‍ക്ക് പരുക്ക്. കഴിഞ്ഞദിവസം ചീക്കാട് ആദിവാസി കോളനിയില്‍ ഉണ്ടായ ആക്രമണത്തിന്റെ തുടര്‍ച്ചയായാണ് കാപ്പിമല മഞ്ഞപ്പുല്ലിലും കടുവയുടെ ആക്രമണം ഉണ്ടായത്. വെള്ളിയാഴ്ച അര്‍ദ്ധരാത്രി ജനവാസ പ്രദേശത്തെത്തിയ കടുവ ആടുകളെയും വളര്‍ത്തു നായ്ക്കളെയും കടിച്ചു.
ഏലമല റോഡില്‍ താമസിക്കുന്ന കുരിശുംമൂട്ടില്‍ ചാണ്ടിയുടെ വീട്ടുമുറ്റത്താണ് 12.30ഓടെ കടുവ ആദ്യം എത്തിയത്. കടുവയുടെ ആക്രമണത്തില്‍ കൂട്ടിലുണ്ടായിരുന്ന ഒരു ആട് ചാവുകയും മറ്റൊന്നിന് ഗുരുതരമായി പരുക്കേല്‍ക്കുകയും ചെയ്തു. ആടുകളെ കെട്ടിയ കയര്‍ കടിച്ചു മുറിക്കാന്‍ കഴിയാതെ വന്നതോടെ കടുവ പിന്മാറുകയായിരുന്നു.
പുലര്‍ച്ചെ മൂന്നു മണിയോടെയാണ് തൊട്ടടുത്ത് താമസിക്കുന്ന ആറുതുണ്ടത്തില്‍ ജോസഫിന്റെ വളര്‍ത്തു നായയെ കടുവ കടിച്ചെടുത്ത് കൊണ്ടുപോയത്. ശബ്ദം കേട്ട് വീട്ടുകാര്‍ ലൈറ്റ് തെളിച്ചതോടെ നായയുമായി കടുവ മറയുകയായിരുന്നു.  വനം വകുപ്പ് അധികൃതരും പൊലിസും സ്ഥലത്തെത്തി പരിശോധന നടത്തി. ചീക്കാട്, കാപ്പിമല പ്രദേശങ്ങളില്‍ തുടര്‍ച്ചയായി ഉണ്ടാകുന്ന കടുവയുടെ ആക്രമണത്തില്‍ ഭീതിയിലായിരിക്കുകയാണ് നാട്ടുകാര്‍.