കൊച്ചി: കതിരൂര്‍ മനോജ് വധക്കേസില്‍ യു.എ.പി.എ ചുമത്തിയത് റദ്ദാക്കണമെന്ന ആവശ്യം തള്ളിയ സിംഗിള്‍ബെഞ്ചിന്റെ വിധിക്കെതിരേ സി.പി.എം കണ്ണൂര്‍ ജില്ലാ സെക്രട്ടറി പി ജയരാജനടക്കമുള്ള പ്രതികള്‍ നല്‍കിയ അപ്പീലില്‍ കേന്ദ്ര സംസ്ഥാന സര്‍ക്കാരുകള്‍ക്ക് നോട്ടിസ് നല്‍കാന്‍ ഹൈക്കോടതി നിര്‍ദേശിച്ചു.
യു.എ.പി.എ നിയമം നിലനിര്‍ത്തിയ സിംഗിള്‍ ബെഞ്ച് ഉത്തരവ് സ്റ്റേ ചെയ്യാന്‍ ഡിവിഷന്‍ ബെഞ്ച് വിസമ്മതിച്ചു. ആര്‍.എസ്.എസ് നേതാവ് കതിരൂര്‍ മനോജിനെ 2014 സെപ്റ്റംബറിലാണ് കൊലപ്പെടുത്തിയത്. സി.ബി.ഐ അന്വേഷിച്ച കേസില്‍ ഒന്നാം പ്രതി വിക്രമന്‍ ഉള്‍പ്പെടെ 19 സി.പി.എം പ്രവര്‍ത്തകര്‍ക്കെതിരേ കുറ്റപത്രം നല്‍കി. പിന്നീട് ഗൂഢാലോചന അന്വേഷിച്ച സംഘം പി ജയരാജനടക്കമുള്ളവരെ പ്രതിചേര്‍ത്ത് അനുബന്ധ കുറ്റപത്രവും നല്‍കി.
പ്രതികള്‍ക്കെതിരേ യു.എ.പി.എ (തീവ്രവാദ പ്രവര്‍ത്തന നിരോധന നിയമം) പ്രകാരമുള്ള കുറ്റങ്ങളും ചുമത്തിയിരുന്നു. എന്നാല്‍ സംസ്ഥാന സര്‍ക്കാരിന്റെ അനുമതിയില്ലാതെയാണ് യു.എ.പി.എ തങ്ങള്‍ക്കുമേല്‍ ചുമത്തിയതെന്നായിരുന്നു പ്രതികളുടെ വാദം. ഇതിനെ സി.ബി.ഐ എതിര്‍ത്തു. കേന്ദ്ര ഏജന്‍സിയാണ് സി.ബി.ഐയെന്നും ഇതിനാല്‍ യു.എ.പി.എ ചുമത്താന്‍ കേന്ദ്ര സര്‍ക്കാരിന്റെ അനുമതിയാണ് വേണ്ടതെന്നുമാണ് അവര്‍ വാദിച്ചത്.
ഹരജി പരിഗണിച്ച സിംഗിള്‍ ബെഞ്ച് ഈ വിഷയം വിചാരണക്കോടതി തീരുമാനിക്കട്ടെയെന്ന് വ്യക്തമാക്കി ഹരജികള്‍ തള്ളിയിരുന്നു. ഇതിനെതിരേയാണ് പ്രതികള്‍ അപ്പീല്‍ നല്‍കിയത്.