നീലേശ്വരം: മുതിര്‍ന്ന മാധ്യമ പ്രവര്‍ത്തകന്‍ സേതു ബങ്കളത്തിനു വെട്ടേറ്റു. ഇന്നു രാത്രി 7.15 ഓടെ തളിയില്‍ ക്ഷേത്രപരിസരത്തെ പഴയ രാജാസ് ഹോസ്റ്റല്‍ കെട്ടിടത്തിനു സമീപത്താണു സംഭവം. ഇവിടെ ഒറ്റയ്ക്കു നില്‍ക്കുകയായിരുന്ന സേതുവിനെ പുതുക്കൈയിലെ മിഥുന്‍ വാക്കത്തി ഉപയോഗിച്ച് വെട്ടുകയായിരുന്നു.

ബഹളം കേട്ട് ഓടിയെത്തിയ നാട്ടുകാരാണ് ഇദ്ദേഹത്തെ തേജസ്വിനി സഹകരണ ആശുപത്രിയില്‍ എത്തിച്ചത്. തലയ്ക്കും നെറ്റിക്കും ആഴത്തില്‍ മുറിവേറ്റിട്ടുണ്ട്. നെഞ്ചിന് പല തവണ ചവിട്ടിയതായും ചികിത്സയില്‍ കഴിയുന്ന സേതു പറഞ്ഞു. പ്രാഥമിക ചികിത്സയ്ക്കു ശേഷം ഇദ്ദേഹത്തെ പരിയാരം മെഡിക്കല്‍ കോളജിലേക്കു മാറ്റി. മിഥുന്‍ ഓടി രക്ഷപ്പെട്ടു. നീലേശ്വരം പൊലിസ് കേസെടുത്ത് അന്വേഷിച്ചുവരുന്നു.  കാഞ്ഞങ്ങാട് നിന്നിറങ്ങുന്ന സായാഹ്ന ദിനപത്രമായ മലബാര്‍ വാര്‍ത്തയുടെ ലേഖകനാണ് സേതു ബങ്കളം.