എരുമപ്പെട്ടി: കിരാലൂര്‍ പരശുരാമ മെമ്മോറിയല്‍ എല്‍.പി സ്‌കൂളിലെ കുരുന്നുകളുടെ ഭാവി തെരുവിലേക്ക് വലിച്ചെറിയപ്പെട്ടിരിക്കുന്നുവെന്ന് കെ.എസ്.ടി.എ സംസ്ഥാന ട്രഷറര്‍ ടി.വി മദന്‍മോഹനന്‍ പറഞ്ഞു. ഹൈക്കോടതി ഉത്തരവ് പ്രകാരം അടച്ചുപൂട്ടിയ വേലൂര്‍ കിരാലൂര്‍ പരശുരാമ മെമ്മോറിയല്‍ എല്‍.പി സ്‌കൂള്‍ ഉടന്‍ തുറന്ന് പ്രവര്‍ത്തിക്കണമെന്ന് ആവശ്യപ്പെട്ട് കെ.എസ്.ടി.എ ജില്ലാ കമ്മറ്റിയുടെ നേതൃത്വത്തില്‍ നടത്തിയ പ്രതിഷേധ ധര്‍ണ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
സംസ്ഥാനത്ത് നിലവില്‍ സാമ്പത്തിക പരാധീനത കാണിച്ച് മനേജര്‍മാര്‍ പരാതി നല്‍കിയ 25ഓളം സ്‌കൂളുകള്‍ അടച്ചുപൂട്ടല്‍ ഭീഷണിയിലാണെന്നും മാനേജര്‍മാരുടെ ഗൂഢതന്ത്രങ്ങളാല്‍ സ്‌കൂളുകള്‍ അടച്ചുപൂട്ടുന്ന നില തുടര്‍ന്നാല്‍ ഇതിന് ഇരകളാകുന്നത് നിര്‍ധനരും സാധാരണക്കാരുമായ കുടുംബങ്ങളിലെ വിദ്യാര്‍ഥികളുമാണെന്ന് മദന്‍ മോഹനന്‍ അഭിപ്രായപ്പെട്ടു. കിരാലൂര്‍ സ്‌കൂളിനു മുന്നില്‍ വെച്ച് നടന്ന ധര്‍ണയില്‍ ജില്ലാ പ്രസിഡന്റ് കെ.ജി മോഹനന്‍ അധ്യക്ഷനായി.
അധ്യാപകരായ കെ.കെ രാജന്‍, പി.കെ ഹരികൃഷ്ണന്‍, ടി.മധുസൂദനന്‍ എന്നിവര്‍ സംസാരിച്ചു. കെ.എസ്.ടി.എ ജില്ലാ ഭാരവാഹികളായ വി.വി ശശി, എ.കെ സലിംകുമാര്‍, പത്മിനി, ജെയിംസ് പോള്‍, പി.ഐ യൂസഫ് തുടങ്ങിയവര്‍ ധര്‍ണക്ക് നേതൃത്വം നല്‍കി.