കൊല്ലം: ഇന്നലെ പുലര്‍ച്ചെ കൊച്ചിയിലെ സ്വകാര്യ ആശുപത്രിയില്‍ ചികിത്സയിലിരിക്കെ അന്തരിച്ച ചലച്ചിത്ര നടന്‍ കൊല്ലം അജിത്തിന്റെ മൃതദേഹം വൈകിട്ട് പോളയത്തൊട് പൊതുസ്മശാനത്തില്‍ സംസ്‌കരിച്ചു.
ഉച്ചക്ക് പന്ത്രണ്ടോടെ മൃതദേഹം കടപ്പാക്കടയിലെ വസതിയില്‍ പൊതുദര്‍ശനത്തിന് വച്ചു. മൃതദേഹത്തില്‍ രാഷ്ട്രീയ സാംസ്‌കാരിക സിനിമാ മേഖലകളിലെ നിരവധിപേര്‍ അന്തിമോപചാരം അര്‍പ്പിച്ചു. സിനിമാ സംഘടന അമ്മക്ക് വേണ്ടി നടന്‍ മുകേഷ് പുഷ്പചക്രം സമര്‍പ്പിച്ചു.
അഞ്ഞൂറിലധികം സിനിമകളില്‍ അഭിനയിച്ച കൊല്ലം അജിത്തിന്റെ ഭൗതിക ശരീരം കാണാന്‍ നിരവധി പേരാണ് കുടുംബ വീട്ടിലെത്തിയത്. പത്മരാജന്റെ പ്രിയപ്പെട്ട നടന്‍മാരില്‍ ഒരാളായിരുന്ന കൊല്ലം അജിത്ത് തൊണ്ണൂറുകളില്‍ മലയാള സിനിമയിലെ സ്ഥിരം സാന്നിധ്യമായിരുന്നു.