ജിദ്ദ: സഊദി അറേബ്യന്‍ തലസ്ഥാനമായ റിയാദില്‍ അത്യാധുനിക അമ്യൂസ്‌മെന്റ് പാര്‍ക്ക് നിര്‍മിക്കാന്‍ കരാര്‍ ഒപ്പിട്ടു. ലോകോത്തര അമ്യൂസ്‌മെന്റ് പാര്‍ക്ക് കമ്പനിയായി സിക്‌സ് ഫ്‌ളാഗ്‌സുമായാണ് കരാര്‍. സഊദി ഇന്‍വെസ്റ്റ്‌മെന്റ് ഫണ്ടുമായാണ് കരാര്‍ ഒപ്പുവച്ചത്. അന്താരാഷ്ട്ര നിലവാരത്തോടെ റിയാദിന്റെ പടിഞ്ഞാറ് ഭാഗത്ത് ഖിദ്ദിയ്യ എന്ന പേരില്‍ വിനോദ സാംസ്‌കാരിക കായിക കേന്ദ്രം വരുന്നുണ്ട്. 2022ലാണ് ഇത് നിലവില്‍ വരിക. പദ്ധതി പ്രദേശത്താണ് ലോകത്തെ മികച്ച അമ്യൂസ്‌മെന്റ് പാര്‍ക്ക് വരുന്നത്.

ദേശീയ അന്തര്‍ദേശീയ കമ്പനികളെ നിക്ഷേപ രംഗത്തേക്ക് ക്ഷണിക്കുന്നതിന്റെ ഭാഗമായാണ് വിനോദ പദ്ധതികള്‍. സല്‍മാന്‍ രാജാവിന്റെയും കിരീടാവകാശി മുഹമ്മദ് ബിന്‍ സല്‍മാന്റെയും നേതൃത്വത്തിലുള്ള വിഷന്‍ 2030ന്റെ ഭാഗമായാണ് പദ്ധതി. അമ്യൂസ്‌മെന്റ് പാര്‍ക്ക് പദ്ധതി രണ്ടര വര്‍ഷം കൊണ്ടാകും പൂര്‍ത്തിയാക്കുക.