റിയാദ്: സഊദിയെ ലക്ഷ്യമാക്കി യമനിലെ വിമതര്‍ വീണ്ടും മിസൈല്‍ ആക്രമണം നടത്തി. വെള്ളിയാഴ്ച രാത്രി ഒമ്പതരയോടെയാണ് അതിര്‍ത്തി പ്രദേശമായ നജ്‌റാന്‍ ലക്ഷ്യമാക്കി ഹൂതികള്‍ തൊടുത്തു വിട്ട മിസൈല്‍ സഊദി റോയല്‍ വ്യോമ പ്രതിരോധ സേന ആകാശത്ത് വച്ചു തന്നെ തകര്‍ത്തത്. നിലം തൊടുന്നതിനു മുന്‍പ് തന്നെ തകര്‍ക്കാന്‍ കഴിഞ്ഞതിനാല്‍ ദുരന്തം ഒഴിവായി. ആളപായമോ നാശ നഷ്ടങ്ങളോ റിപ്പോര്‍ട്ട് ചെയ്യപ്പെട്ടിട്ടില്ല.

പ്രകോപനപരമായ നടപടിക്ക് പിന്നില്‍ ഇറാന്‍ പിന്തുണയുള്ള ഹൂതികളാണെന്നും ഇറാന്‍ ആയുധങ്ങളാണ് ഹൂതികള്‍ ഉപയോഗിക്കുന്നതെന്ന് നേരത്തെ തന്നെ തെളിഞ്ഞതായും വ്യക്തമാക്കി സഊദി അധികൃതര്‍ രംഗത്തെത്തിയതിനു പിന്നാലെയാണ് വീണ്ടും തുടര്‍ മിസൈല്‍ ആക്രമണം നടക്കുന്നത്.

2015 ജൂണ്‍ ആറു മുതല്‍ ഇതുവരെ 104 ബാലിസ്റ്റിക് മിസൈല്‍ സഊദിയിലേക്ക് യമനിലെ ഇറാന്‍ സഹായമുള്ള ഹൂതികള്‍ പ്രയോഗിച്ചതായാണ് കണക്കുകള്‍. എന്നാല്‍, ഒന്ന് പോലും നിലം തൊടാതെ ആകാശത്തു വെച്ച് തന്നെ തകര്‍ക്കുന്നതില്‍ സഊദി വ്യോമ പ്രതിരോധ സേനയും മിസൈല്‍ വേധ സംവിധാനവും വിജയിച്ചതിനാല്‍ കനത്ത ദുരന്തത്തില്‍ നിന്നും രക്ഷപ്പെടുകയായിരുന്നു.