മഞ്ചേരി: അധിക ജോലിക്കു മതിയായ വേതനം ലഭിക്കുന്നില്ലെന്നു ചൂണ്ടിക്കാട്ടി കോടതി ജീവനക്കാരുടെ പ്രതിഷേധം. കേസ് തീര്‍പ്പാക്കുന്നതിന്റെയും സാധാരണക്കാരനു നീതി ഉറപ്പാക്കുന്നതിന്റെയും ഭാഗമായി അവധി ദിനങ്ങളില്‍ നടത്തുന്ന പ്രത്യേക അദാലത്തിനു മതിയായ വേതനം നല്‍കാത്തതിലാണ് അദാലത്ത് ദിനമായ ഇന്നലെ തുച്ഛമായ വേതനം തിരസ്‌കരിച്ച് കോടതി ജീവനക്കാര്‍ പ്രതിഷേധിച്ചത്.
ക്ലര്‍ക്കിന്റെയും ടൈപ്പിസ്റ്റിന്റെയും ജോലി ചെയ്യുന്നവര്‍ക്ക് 200 രൂപയും പ്രോസസ് സെര്‍വര്‍, കോര്‍ട്ട് കീപ്പര്‍മാര്‍ എന്നിവര്‍ക്ക് 150 രൂപയുമാണ് നല്‍കുന്നത്. വിദൂരങ്ങളില്‍നിന്നു വരുന്ന ജീവനക്കാര്‍ക്ക് ഈ തുക യാത്രാകൂലിക്കുപോലും തികയില്ലെന്ന വിമര്‍ശനമാണുയരുന്നത്. അദാലത്ത് ദിനങ്ങളില്‍ ജോലി ചെയ്യുന്ന മറ്റ് ഓഫിസര്‍മാരുടെയും അഭിഭാഷകരുടെയും വേതനം കാലാനുസൃതമായി പരിഷ്‌കരിച്ചപ്പോള്‍ ജീവനക്കാരുടെ വേതന വര്‍ധനവ് അനുമതി ലഭിച്ചില്ലെന്ന കാരണം പറഞ്ഞു നീട്ടിക്കൊണ്ടുപോകുകയാണെന്നും ജീവനക്കാര്‍ ആരോപിച്ചു.
ഓഫിസര്‍മാരുടേതു 500 രൂപയില്‍നിന്ന് ആയിരമായും അഭിഭാഷകരുടേത് 400ല്‍നിന്ന് 800 രൂപയായും നേരത്തെ വര്‍ധിപ്പിച്ചിരുന്നു. ഇതിനു ശേഷവും ഓഫിസര്‍മാരുടെ വേതനം 3,000 രൂപയായും അഭിഭാഷകരുടേത് 2,400 രൂപയായും വര്‍ധിപ്പിച്ചപ്പോഴും ജീവനക്കാരുടെത് പഴയ നിരക്കില്‍ ഒതുങ്ങി.