ചേലേമ്പ്ര: ദേശീയപാത വികസനവുമായി ബന്ധപ്പെട്ട അലൈന്‍മെന്റിലെ അട്ടിമറിക്കെതിരേ ചേലേമ്പ്രയില്‍ പ്രതിഷേധം ശക്തമാകുന്നു. പഞ്ചായത്ത് പ്രസിഡന്റിന്റെ ഒത്താശയോടെ റീ അലൈന്‍മെന്റില്‍ അട്ടിമറി നടത്തിയതായാണ് ഇരകള്‍ ആരോപിക്കുന്നത്.
ഇതിനെതിരേ ഇരകള്‍ പഞ്ചായത്ത് ഓഫിസിനു മുന്നില്‍ കുടില്‍ കെട്ടി സമരം തുടങ്ങി. ആദ്യത്തെ അലൈന്‍മെന്റ് പ്രകാരം കുറഞ്ഞ വീടുകളും ഭൂമിയും മാത്രമാണ് നഷ്ടപ്പെട്ടിരുന്നത്. എന്നാല്‍, ഗ്രാമപഞ്ചായത്ത് അംഗമുള്‍പ്പെടെയുള്ള ചില വ്യക്തികളുടെ ഭൂമിയും കെട്ടിടവും സംരക്ഷിക്കപ്പെടുന്നതിനു വേണ്ടിയാണ് ഭരണസമിതിയിലെ ചിലരുടെ ഒത്താശയോടെ അലൈന്‍മെന്റില്‍ തിരിമറി നടത്തിയതെന്നാണ് സമരക്കാര്‍ പറയുന്നത്. ദേശീയപാതയുടെ നീളം കുറയുകയും വളവുകള്‍ ഇല്ലാതാകുകയും ചെയ്യുന്ന രീതിയിലുമായിരുന്നു ആദ്യ അലൈന്‍മെന്റ്. 750 മീറ്റര്‍ കുന്നിന്‍ പ്രദേശവും ജനവാസം കുറഞ്ഞ പ്രദേശവുമായതിനാല്‍ 20 വീടുകള്‍ മാത്രമാണ് അലൈന്‍മെന്റില്‍ ഉള്‍പ്പെട്ടിരുന്നത്. കൃഷി സ്ഥലങ്ങളും നഷ്ടപ്പെടുമായിരുന്നില്ല.
എന്നാല്‍, പുതിയ അലൈന്‍മെന്റ് പ്രകാരം റോഡിനു നീളം കൂടുകയും വളവുകള്‍ രൂപപ്പെടുകയും ചെയ്യും. രണ്ടു പള്ളികളും മദ്‌റസയും പൊളിച്ചുമാറ്റേണ്ടിവരും. 60 വീടുകള്‍ പൂര്‍ണമായും നഷ്ടപ്പെടും.
കൂടാതെ ചേലേമ്പ്രയിലെ പ്രധാന ടൗണായ ഇടിമുഴിക്കല്‍ അങ്ങാടി പൂര്‍ണമായും ഇല്ലാതാകും.