ഗോള്‍ഡ് കോസ്റ്റ്: ചരിത്ര നേട്ടം സ്വന്തമാക്കി മലയാളികളുടെ അഭിമാനമായ മുഹമ്മദ് അനസ് യഹിയ 400 മീറ്റര്‍ പോരാട്ടത്തിന്റെ ഫൈനലിലേക്ക് കുതിച്ചു. ഇതിഹാസ താരം മില്‍ഖാ സിങിന് ശേഷം കോമണ്‍വെല്‍ത്ത് ഗെയിംസ് അത്‌ലറ്റിക്‌സ് പോരാട്ടത്തിന്റെ ട്രാക്കിനത്തില്‍ ഫൈനലില്‍ പ്രവേശിക്കുന്ന ആദ്യ ഇന്ത്യന്‍ പുരുഷ താരമെന്ന നേട്ടമാണ് അനസ് സ്വന്തമാക്കിയത്. 400 മീറ്ററിന്റെ സെമി ഫൈനല്‍ പോരാട്ടത്തില്‍ 45.44 സെക്കന്‍ഡില്‍ ഫിനിഷ് ചെയ്താണ് താരം ഫൈനലിലേക്ക് കടന്നത്. ഫൈനല്‍ ഇന്ന് വൈകിട്ട് നടക്കും. 400 മീറ്ററിലെ നിലവിലെ ദേശീയ റെക്കോര്‍ഡ് സ്വന്തം പേരിലാക്കിയ താരമാണ് അനസ്. 45.32 സെക്കന്‍ഡാണ് താരത്തിന്റെ മികച്ച പ്രകടനം. 

ഹൈ ജംപില്‍ തേജസ്വിന്‍ ശങ്കര്‍ ഇന്ത്യന്‍ പ്രതീക്ഷകളുമായി ഫൈനലിലേക്ക് എത്തി. വനിതകളുടെ 400 മീറ്ററിന്റെ സെമിയിലേക്കെത്തി ഇന്ത്യയുടെ ഹിമ ദാസും പ്രതീക്ഷ നല്‍കുന്നു.
അതേസമയം ഷോട് പുട്ട് ഫൈനലില്‍ മത്സരിച്ച തേജീന്ദര്‍ പാലും വനിതകളുടെ 10000 മീറ്ററില്‍ മത്സരിച്ച എല്‍ സൂര്യയും നിരാശപ്പെടുത്തി.

400 മീറ്റര്‍ ഫൈനല്‍ ഇന്ന്; പ്രതീക്ഷയോടെ അനസ്

ഗോള്‍ഡ് കോസ്റ്റ്: അത്‌ലറ്റിക്‌സ് പോരാട്ടത്തില്‍ 400 മീറ്ററിന്റെ ഫൈനലില്‍ ഇന്ത്യന്‍ പ്രതീക്ഷകളുമായി മലയാളി താരം മുഹമ്മദ് അനസ് ഇന്നിറങ്ങും.
സെമി ഫൈനലില്‍ ഒന്നാം സ്ഥാനത്ത് ഫിനിഷ് ചെയ്താണ് അനസ് ഫൈനലിലേക്ക് കുതിച്ചെത്തിയത്. ഇന്ന് വനിതകളുടെ 1500 മീറ്റര്‍, വനിതകളുടെ ഹാമ്മര്‍ ത്രോ, പുരുഷ വിഭാഗം 110 മീറ്റര്‍ ഹര്‍ഡില്‍സ്, വനിതകളുടെ ട്രിപ്പിള്‍ ജംപ് ഫൈനലുകളും ഇന്ന് നടക്കും.