സ്വന്തം ലേഖകന്‍

തിരുവനന്തപുരം: ജില്ലയിലെ ഹോട്ടല്‍, റെസ്റ്റോറന്റ് ഉടമകള്‍ 24 മണിക്കൂര്‍ കടകള്‍ അടച്ചിട്ട് ജി.എസ്.ടി ഭവന്‍ മാര്‍ച്ച് നടത്തി. ഹോട്ടല്‍ ഭക്ഷണത്തെ ജി.എസ്.ടിയില്‍ നിന്നും ഒഴിവാക്കണമെന്നാവശ്യപ്പെട്ടായിരുന്നു കേരളാ ഹോട്ടല്‍ ആന്‍ഡ് റെസ്റ്റോറന്റ് അസോസിയേഷന്റെ നേതൃത്വത്തില്‍ കടയടപ്പും മാര്‍ച്ചും നടത്തിയത്.
ചെറുകിട വ്യാപാരമേഖലയിലെ സംഘടനകളുടെ ആശങ്കകള്‍ക്ക് പരിഹാരം കാണാതെ നിയമം ഏകപക്ഷീയമായി നടപ്പാക്കിയതിനെതിരെയാണ് കടകള്‍ അടച്ച് പ്രതിഷേധിച്ചത്. ഇതിന്റെ ഭാഗമായി നടത്തിയ മാര്‍ച്ച് പാളയം രക്തസാക്ഷിമണ്ഡപത്തില്‍ നിന്നും ആരംഭിച്ചു. ഹോട്ടല്‍ ഉടമകളും തൊഴിലാളികളും ഉള്‍പ്പെടെ നൂറുകണക്കിന് പേര്‍ മാര്‍ച്ചില്‍ അണിനിരന്നു. പാളയത്ത് നിന്നും ആരംഭിച്ച മാര്‍ച്ച് പ്രസ്‌ക്ലബിന് സമീപത്തെ ജി.എസ്.ടി ഭവന് മുന്നില്‍ പൊലിസ് തടഞ്ഞു. തുടര്‍ന്നു നടന്ന ധര്‍ണ എ. സമ്പത്ത് എം.പി ഉദ്ഘാടനം ചെയ്തു. ജി.എസ.്ടി നടപ്പിലാക്കിയപ്പോള്‍ എസി ഹോട്ടലുകള്‍ക്ക് 18 ശതമാനവും നോണ്‍ എസി ഹോട്ടലുകള്‍ക്ക് 12 ശതമാനവുമായി നികുതി ഉയര്‍ന്നു. ഇതിനെതിരെ നടന്ന സമരങ്ങളെ തുടര്‍ന്നു അഞ്ചു ശതമാനമായി ജി.എസ്.ടി കുറച്ചു. എന്നാല്‍ ഇവിടെയും ചെറുകിട ഹോട്ടലുകളെ തഴഞ്ഞു. അഞ്ചു ശതമാനം നികുതി കയ്യില്‍ നിന്നും അടയക്കാന്‍ കഴിയാത്ത സാഹചര്യത്തില്‍ ഹോട്ടല്‍ അടച്ചു പൂട്ടുകയോ വിലവര്‍ധിപ്പിക്കുകയോ ചെയ്യേണ്ട സാഹചര്യമാണ് നിലനില്‍ക്കുന്നത്. വന്‍കിട ഹോട്ടലുകളെ സഹായിക്കുന്ന നിലപാടാണ് ജി.എസ്.ടി കൗണ്‍സിലും കേന്ദ്രസര്‍ക്കാര്‍ സ്വീകരിക്കുന്നതെന്നും അദ്ദേഹം കുറ്റപ്പെടുത്തി.
പാളയത്ത് വി.എസ് ശിവകുമാര്‍ എം.എല്‍.എ ഉദ്ഘാടനം ചെയ്തു. ജി.എസ്.ടി വന്നതിന് ശേഷം അതിന്റെ ദുരിതഫലങ്ങള്‍ ഏറ്റവും കൂടുതല്‍ അനുഭവിക്കേണ്ടി വന്നത് ഹോട്ടല്‍ മേഖലയാണെന്നു ശിവകുമാര്‍ പറഞ്ഞു. കോമ്പോസിഷന്‍ സ്‌കീമില്‍ ഉള്‍പ്പെടുത്തിയിട്ടുള്ള ചെറുകിട ഹോട്ടലുകളില്‍ അഞ്ചു ശതമാനം നികുതിയാണ് ഏര്‍പ്പെടുത്തിയിട്ടുള്ളത്. ഇത് ഹോട്ടലുടമ തന്നെ അടയ്ക്കണമെന്നാണ് സര്‍ക്കാര്‍ ആവശ്യപ്പെടുന്നത്. ഈ അധികബാധ്യത മൂലം ഹോട്ടലുകള്‍ അടച്ചുപൂട്ടേണ്ട സാഹചര്യമാണ് ഉള്ളതെന്നു ശിവകുമാര്‍ പറഞ്ഞു.
അസോസിയേഷന്‍ സംസ്ഥാന പ്രസിഡന്റ് മൊയ്തീന്‍കുട്ടി ഹാജി, ജനറല്‍ സെക്രട്ടറി ജി. ജയപാല്‍, ജില്ലാ പ്രസിഡന്റ് ബി. ജയധരന്‍നായര്‍, സെക്രട്ടറി ബി. വിജയകുമാര്‍, രക്ഷാധികാരി ജി. സുധീഷ്‌കുമാര്‍, ജനറല്‍ കണ്‍വീനര്‍ എ.എം നിസാം, വെണ്‍പാലവട്ടം ചന്ദ്രമോഹന്‍ സംസാരിച്ചു.