കൊച്ചി: വാരാപ്പുഴയില്‍ ഗൃഹനാഥന്‍ തൂങ്ങിമരിച്ച സംഭവത്തില്‍ പൊലിസ് കസ്റ്റഡിയില്‍ എടുത്ത ശ്രീജിത്ത് എന്ന യുവാവ് മരിച്ചതില്‍ പ്രതിഷേധിച്ച് പറവൂര്‍ നിയോജക മണ്ഡലത്തില്‍ ബി.ജെ.പി ആഹ്വാനം ചെയ്ത ഹര്‍ത്താലില്‍ വ്യാപക അക്രമം. പിഞ്ചുകുഞ്ഞിനെ ആശുപത്രിയിലേക്ക് എത്തിക്കുന്നതിനു പോയ യുവാവിനെ ഹര്‍ത്താല്‍ അനുകൂലികള്‍ ക്രൂരമായി മര്‍ദ്ദിച്ചു. പൊലിസ് നോക്കിനില്‍ക്കെയാണ് ബി.ജെ.പി പ്രവര്‍ത്തകരുടെ ആക്രമണം.

സ്വകാര്യ ബസുകള്‍ രാവിലെ സര്‍വിസ് നടത്താന്‍ തുടങ്ങിയെങ്കിലും സമരക്കാര്‍ ഇടപെട്ടു നിര്‍ത്തിവച്ചു. കെ.എസ്.ആര്‍.ടി.സിയും വരാപ്പുഴ ഒഴിവാക്കിയാണ് സര്‍വിസ് നടത്തുന്നത്. രാവിലെ നിരത്തിലിറങ്ങിയ ഇരുചക്ര വാഹനങ്ങളുള്‍പ്പടെയുള്ളവ തടയുന്നുണ്ട്. രാവിലെ ആറു മുതല്‍ വൈകിട്ട് ആറുവരെയാണ് ഹര്‍ത്താല്‍.