യാങ്കോന്‍: പത്ത് റോഹിംഗ്യന്‍ മുസ്‌ലിംകളെ കൊലപ്പെടുത്തിയ സംഭവത്തില്‍ ഏഴ് മ്യാന്‍മര്‍ സൈനികര്‍ക്ക് ജയില്‍ ശിക്ഷ. കൊലപാതകത്തില്‍ പങ്കാളിത്വമുണ്ടെന്ന് കണ്ടെത്തിയതിനെ തുടര്‍ന്ന് സൈനികരെ കഠിന ജോലികള്‍ എടുപ്പിക്കുന്നതോടൊപ്പം പത്ത്‌വര്‍ഷത്തെ തടവിനും വിധിച്ചെന്ന് അധികൃതര്‍ പ്രസ്താവനയില്‍ പറഞ്ഞു.
റോഹിംഗ്യകളുടെ കൊലപാതകത്തില്‍ പങ്കുണ്ടെന്ന് ഈ വര്‍ഷം ആദ്യത്തിലാണ് മ്യാന്‍മര്‍ സൈന്യം അംഗീകരിക്കുന്നത്. കഴിഞ്ഞ വര്‍ഷം സെപ്റ്റംബറിലാണ് കൊലപാതകം നടന്നത്. ഇന്‍ ദിന്‍ ഗ്രാമത്തില്‍ നടന്ന അക്രമത്തില്‍ നാല് സൈനിക ഓഫിസര്‍മാരും മൂന്ന് സൈനികരും കുറ്റക്കാരാണെന്ന് മ്യാന്മര്‍ മിലിട്ടറി കോടതിയാണ് വിധിച്ചത്.
അതിനിടെ രണ്ട് മാധ്യമപ്രവര്‍ത്തകര്‍ക്കെതിരേ ചുമത്തിയ കേസ് പിന്‍വലിക്കണമെന്ന ഹരജി ഇന്നലെ കോടതി തള്ളി. രാജ്യദ്രോഹ പ്രവര്‍ത്തനങ്ങള്‍ ഉള്‍പ്പെടെയുള്ളവ ചുമത്തി റോയിട്ടേഴ്‌സിന്റെ മാധ്യമപ്രവര്‍ത്തകരായ വാ ലോണ്‍, ക്യോ സോ ഓ എന്നിവരെയാണ് അറസ്റ്റ് ചെയ്തത്.
റാഖൈന്‍ പ്രദേശങ്ങളില്‍ സര്‍ക്കാര്‍ നേതൃത്വത്തില്‍നടന്ന ആക്രമണങ്ങള്‍ ഉള്‍പ്പെടെയുള്ളവ പുറത്ത് കൊണ്ടുവന്നതിനാണ് മാധ്യമപ്രവര്‍ത്തകരെ അറസ്റ്റ് ചെയ്തതെന്ന് ആരോപണം ഉയര്‍ന്നിരുന്നു.