കരുളായി: സാധാരണ കെ.എസ്.ഇ.ബി വീടുകളിലേക്കു വൈദ്യുതി നല്‍കുമ്പോള്‍ കരുളായിയിലെ ചിറ്റങ്ങാടന്‍ ഉമ്മര്‍ കെ.എസ്.ഇ.ബിയിലേക്കു വൈത്യുതി നല്‍കും. തന്റെ വീടിനു മുകളില്‍ സ്ഥാപിച്ച സോളാര്‍ പ്ലാന്റില്‍നിന്നാണ് വീട്ടിലെ ഉപയോഗത്തിനു ശേഷമുള്ള വൈദ്യുതി കെ.എസ്.ഇ.ബിയിലേക്കു നല്‍കാന്‍ ഉമ്മര്‍ ഒരുങ്ങുന്നത്.
സംസ്ഥാന സര്‍ക്കാര്‍ അനര്‍ട്ടുമായി ചേര്‍ന്നു നടപ്പാക്കുന്ന ശൃംഗല ബന്ധിത സൗരോര്‍ജ നിലയം പദ്ധതി പ്രകാരമാണിത്. മൂന്നു കിലോവാട്ട് ശക്തിയുള്ള സോളാര്‍ പ്ലാന്റാണ് വീടിനു മുകളില്‍ ഒരുക്കിയിരിക്കുന്നത്. ഇതുവഴി പ്രതിദിനം പതിനഞ്ച് യൂനിറ്റോളം വൈദ്യുതി ഉല്‍പാദിപ്പിക്കും. വൈദ്യുതി കെ.എസ്.ഇ.ബിക്കു കൈമാറുന്നതിനു പ്രത്യേക മീറ്ററും ഫ്യൂസ് സംവിധാനങ്ങളും ഒരുക്കിയിട്ടുണ്ട്.
സോളാര്‍ പ്രവര്‍ത്തിക്കാത്ത സമയത്ത് ഈ ലൈന്‍വഴി വീട്ടിലേക്കു സാധരണ രീതിയില്‍ വൈദ്യുതിയെത്തുകയും ചെയ്യും. കെ.എസ്.ഇ.ബി സാധാരണ രീതിയില്‍ വൈദ്യുതി വാങ്ങുന്ന വില കണക്കാക്കി ഉമ്മറിനു നല്‍കും.
രണ്ടു ലക്ഷം രൂപയാണ് പ്ലാന്റ് സ്ഥാപിക്കാന്‍ ചെലവായത്. അനര്‍ട്ടിന്റെ സഹായമായി ചെലവിന്റെ അന്‍പതു ശതമാനം ലഭിച്ചിട്ടു@്. പദ്ധതിയുടെ ഉദ്ഘാടനം ഇന്നു നടക്കും.