തിരുവന്തപുരം: പൊലിസുകാര്‍ക്ക് ഭാഷാദിനത്തില്‍ വിതരണം ചെയ്ത മുഖ്യമന്ത്രിയുടെ പൊലിസ് മെഡലുകളില്‍ വ്യാപകമായ അക്ഷരത്തെറ്റെന്ന് പരാതി. ' കേരളാ മുഖ്യമന്ത്ര യുടെ പോല സ് മെഡന്‍' എന്നാണ് എഴുതിയിരിക്കുന്നത്. വിഷയം അടിയന്തരമായി തന്നെ പരിഹരിക്കാന്‍ സംസ്ഥാന പൊലിസ് മേധാവി ഷെയ്ഖ് ദര്‍വേഷ് സാഹിബ് ഉത്തരവിട്ടിട്ടുണ്ട്. 

കേരളപ്പിറവി ദിനാഘോഷത്തിന്റെ ഭാഗമായി കഴിഞ്ഞ ദിവസം 264 പൊലിസുകാര്‍ക്കാണ് മെഡല്‍ വിതരണം ചെയ്തത്. ഇതില്‍ നിരവധി പേര്‍ക്ക് ലഭിച്ച മെഡലുകളില്‍ അക്ഷരത്തെറ്റുകളുണ്ട്. പകരം മെഡലുകള്‍ നല്‍കാന്‍ ടെന്‍ഡര്‍ എടുത്ത സ്ഥാപനത്തിന് ഡിജിപി നിര്‍ദേശം നല്‍കി. അടിയന്തരമായി പുതിയ മെഡലുകള്‍ വിതരണം ചെയ്യണമെന്നാണ് നിര്‍ദേശം. അക്ഷരത്തെറ്റുള്ള മെഡലുകള്‍ ഉടന്‍ തിരികെ വാങ്ങുന്നതായിരിക്കും.